ल्हानान दिङ ङ्हाच्छाला ताम हिन्ना । ङ्यासे ताजिन्बा मुबा । ठिहिर्याप ताबा हाङबा मुबा । बाङसे ग्लिङ ताइचिबा मुबा । थे सिम्बा थेन दोपरि याखारगि प्राङबो जाजा माइ ग्यामरि ब्राचिबा मुबा । थेला काङ थेन क्रा ङ्हि नोन लिखन्डि मुबा । हिन्बाम थे दिमग्याम थोन्मा थेला काङरि जोडि गि चप्पल मुबा । वास्तबरि थे चप्पल थेला आमाला मुबा । तासाइ थे चप्पल चोदे ग्रेन मुबा कि थेसे ग्याम थामा गोर ङ्हि ग्रेन गाडिजुग बाङसे छ्योङबासे लामा थे गाडि ग्याम जोगाब ताबारि म्हाइमा थे चप्पल थेला काङग्याम म्हाजि । याखारगि चप्पल स्याप नोन आस्याप्नि । स्यान्दो चप्पल याखारगि केटासे ग्रेन तामाहेन्से ह्राङला लाइनुदा डाडि स्होबारि गे ल्हागतिला बिसि जबरजस्ति बोर्जि । 
थेतासि जाजा माइ काङ थानथान ब्राचिबा मुबा । सिम्बासे लासि थेला काङकादे वाला थेन पिङ ताजिन्बा मुबा । याखारगि थाङने थैलिरि तिलाइ सलाइजुगु थेन यारि मुठिनाङ सालाइ काटि थोसि थे चुङबारि ब्राचिबा मुबा । तासाइ नोन दिनगि कोर्मा सुताइ नोन खालाइसे थेला सलाइ ग्लुबा आरेमुबा । न्हा खालाइसे थेदा  सुका गि न्होर नोन पिन्बा मुबा । हाङबा थेन फोख्रेन्बासे ल्होगल्होग दार्सि थे कुत्रुक्क तासि ब्राचिबा मुबा । ओन्छ्यान थे जाजा माइ दुखला मुर्तिह्राङबान म्राङमुबा । थेला ङ्याम्बा क्राफिरि ग्लिङला काफे ताइचिबा मुबा । ग्लिङला काफेह्राङबा डल्लो थेला बामफिरि पोपचिमुबा । तासाइ थेदा थेला वास्ता आरेमुबा । 

सडक ङामला दिमजुगुला झ्यालजुगुरि नाङसाल लुङचिबा मुबा । छार दिङला तिरे ङ्हाच्छाला ङ्यासे ताबासे दिमदिमरि छार ल्हो तेन्बारि ज्याबाज्याबा स्हेजुगु मिन्बाकेन मुबा । हासला सेकुवाला बास्न ल्हेचिमुबा । म्हिजुगुसे ल्होछार तेन्बा तयारि लाचिबा ताम जाजा माइदा थाहा मुबा । दिम ङ्हिला गुङला याखारगि गुरि थे ब्लेकख्याजि ओम पुइमुला गुङरि कामसिङ थान्सि खाम्देदोना खुम्च्याप ताजि । तासाइ चुह्राङ लासि नोन थेसि हाङबा स्युर्बारि आखाम्नि । डब्बा गि सलाइ सुताइ आग्युर्बा ओम दिमरि बोर्बारि मोहर गि सुताइ आरेबासे थे दिमरि निबारि आखाम्नि । सलाइ आचुङना दिमरि निजि बिसाम थेला आपासे थेदा तोबा निस्चित मुबा । चु बिमा दिमन्हाङरिए चुरिह्राङबान सिम्बा मुबा, थेन्ना तला गि दिमला डेङला गालजुगु पराल थेन ल्हेजाङसे ख्यासाइ नोन छाना दिग्याम ल्हानान लाबा चलप तामुबा । 

सिम्बासे लामा थेला जाजाबा याजुगु कठ्याङग्राप तासि झान्डाइ छ्याजि । सलाइला काटि डेङरि ठोक्सि म्राबारि खाम्साम कठ्याङग्राप ताबा जुम्बिजुगु ङ्याम्ना लाबारि खाम्सेला मुसिम । मुठा गि सलाइग्याम काटि गि सलाइ तेमा तिला ताला ओम ? थेसे डेङरि याखारगि काटि चोल्जि । झ्यार्रा लासि काटि लुङजि । लुङबा काटि फिरि थेसे या थान्जि । थेसे जाबा मैनबत्तिसे ह्राङ नोन लेप्बा थेन ह्याल पिन्जि । देन्बान थे अनौठो ह्याल मुबा । थेदा ग्रेन डोइखाबा कुदाप ङामरि चिबाह्राङ नोन छोर्जि । सलाइला काटि कादे ज्याना लासि लुङजि । थेदा चुह्राङबा डोइखाबा छोर्जि कि काङए लेप्बा बिचारसे थेसे काङ ङ्हाच्छा स्योङजि । तासाइ सलाइला काटि सिजि । डोइखाबा कुदाप सुपम्हाजि । थेला यारि गाङसाल क्रोबा ठुटो जेक्खे लेङबा मुबा । 

थेसे स्यान्दो काटि डेङरि सुइजि । झिलिक्क लासि ल्हाम थोन्जि । थेला ह्याल खानाङ परतिजि थे डेङ झुल तेबान पारदर्सि ताजि । थेसे कोठा न्हाङरि च्याबारि आखाम्नि । ग्लिङ ह्राङबा तार क्वानसे टेबुल गाप्बा मुबा । थेफिरि भोजला परिकारजुगु सजप लाबा मुबा । साग्लो हास सेकप लासि थान्बा मुबा । थेदा स्याउला प्लेन थेन किसमिससे सिङगारप लाबा मुबा । आझान अनौठो तिला ताजि बिसाम ह्याकुलोरि चक्कु थेन काटा क्याथान्बा हासला थे साग्लो सेकुवा किस्तिग्याम प्लोन छ्योङसि मार फाप्जि ओम जाजाबा ज्योइ ल्हेसि कोठाला सा वाइसि जाजा माइजा दोगाजि । थेनोन दुइरि सलाइ सिजि । थेलिच्छाम थेला ओन्छाङ रुङबा, बाम्बा थेन सिम्बा भित्ताबाहेक तिलाइ आम्राङनि । 

थेसे दोसिन स्यान्दो काटि म्राजि । चु रेमरि थेसे ह्राङदा सिङगार तिबा ज्याबा क्रिसमस दोङदिरि स्याप्जि । थेसे फ्युक्पो ब्यापारिला दिमरि ऐनाला म्रापग्याम म्राङबा क्रिसमस दोङबिमा चु ल्हानान ग्रेन थेन ज्याबा मुबा । दोङला पिङ हागाजुगुरि तोङजा जाजा मैनबत्तिजुगु लुङचिबा मुबा । पसलला सोकेसजुगुरि म्राङबा ह्राङबा रङगिन चित्रजुगु थेरि च्योथान्बा मुबा । जाजा माइसे क्रिसमसला दोङरिक्यार या स्योङजि, ओम थेनोन दुइरि सलाइ सिजि । 

क्रिसमसला नाङसालजुगु तोरतोर तासिकेन निजि । चोदे तोर दोजिकि थेकादे मुला सार ह्राङनोन म्राङजि । ओम थेसे याखारगि सार ताइबा म्राङजि । सार ताइमा थेला लिच्छा मेला रेखा ह्राङबा म्राङजि । ‘खालाइ सि लाबा ह्राङबा मुला’ जाजा माइसे म्हान्जि । सार ताइमा खाजिबाइ आत्म स्वर्गरि निला बिसि थेला मामसे थेदा पाङबा डान्जि । चु जाम्बुलिङरि थेदा माया लाबा थेला माम जेक्खे मुबा । थेए नोन डोङजिन्जि । 

थेसे दोसि स्यान्दो काटि डेङरि कोरतिजि । थेला ख्यारख्यु ह्याल ल्हेजि । थे ह्यालरि थेसे माम खुयुदा म्राङजि । थेला स्ह्या ह्याल थेन स्पस्ट छ्यामरि ङ्याम्बा थेन मायालु म्राङमुबा । ‘माम’, जाजा माइ क्रिङजि, ‘ङादाइ नोन ह्राङतेन छ्याम बोरस्ह्युगो । सलाइ काटि सिबातेन डोइखाबा कुदाप, सेकाप लाबा हास, ग्रेन ज्याबा क्रिसमस दोङ म्हाबा ह्राङ नोन ह्राए नोन म्हास्ह्युसेला मुला । ङादा थाहा मुला ।’ थेतासि थेसे सलाइला पुरान मुठा म्राबारि हतार आलानि, तिल्दाबिसाम थेसे मामदा ह्राङतेन छ्यामनोन थान्बारि म्हाइबा मुबा । सलाइला काटिला मुठा म्रामा दिनरि तेबान ह्याल ताजि । थे ह्यालरि थेला माम आउदिन भव्य थेन जेबा म्राङजि । थेसे जाजा माइदा कुरि किन्जि ओम थे ङ्हि नोन थे ह्यालरि ताङबान जाम्बुलिङला तोरतोर निजि । थेनिकादे हाङबा, ख्रेन्बा, दुख, स्हु तिलाइ आताबा लाजा निजि ।

स्ह्योरि योनान म्हिजुगुसे जाजा माइदा डेङरि गेन्सि चिबा म्राङजि । थेला ग्राम्बा उर ताजिन्बा मुबा तासाइ थेला सुङ ङेसि चिबा मुबा । ल्होछारला पुर्वसन्ध्यारि थे जमप तासि सिबा मुबा । ल्होछार दिनिला होइस्हेर जाजा लासफिरि टल्कप ताजि । मृत्युसे थेला ल्हुइदा कोङना लाबा मुबा । थेला यासे सलाइ चुङचिबा मुबा । सलाइला मुठागि लुङजिन्बा मुबा । ‘थेसे ह्राङदा लेप्ना लाबा प्रयास लाजिम’ खालाइसे पाङजि । ल्होछारला दिनरि थेसे खाराङबा ज्याबा स्हे म्राङजि, ओम ह्राङला मामतेन थे खाजिबा गरिमामय लोकरि वाङजि बिबा खालाइसे नोन अनुमान लाबारि आखाम्नि । 

दोःबा : यकिना अगाध