मागारजुगु ताङसि क्लाङबाम एनिकादेसे नोन ज्याना लासि च्याबा तातोला । मागारजुगु स्यापुङबा इसारारि मागार खाराङबा खाराङबा नक्कल लाला ओम थेला उपद्रजुगु नोन एनिकादेसे च्याबा तातोला । एनिकादेसे थेदा दिमजुगुग्याम क्वान बोर्सि ह्यार्बाकेन लाबा म्राङबा मुसिम । तासाइ तिनि ङा एनिकादेदा चुह्राङबा ताम पाङला, थेग्याम थाहा तासेला मुला कि मागार ब्योनजुगुतेन ह्रो नोन स्होबारि खाम्ला ।

तिलाइ दुइ ङ्हाच्छा लखनउरि याखारगि सर्कस–कम्पनि खाबा मुबा । थे कम्पनितेन च्यान, तावाम, चिुतवा थेन स्यान्दो ल्होलो थरिला जनावरजुगु मुबा । चु ल्होलो प्रकारला जनावरजुगुबाहेक याखारगि माकारए नोन मुबा, थेला मिन मिठु मुबा । जातकुजुगुला ल्हानान समुहजुगु मुतेबा रे चु जनावरजुगुदा च्याबारि खामुबा । मिठुन थेनिकादेदा मुतेबा बिमा ज्याबा ङ्हाम्मुबा । थेनोन जातुकुजुगु गुङरि गोपालए गिक्खे मुबा । थे मुतेबा रे खामुबा ओम मिठुला ङामरि घन्टौ चिचिमुबा । थेदा च्यान, तावाम, चितुवा ल्होलो जनावर सेम आनिमुबा । थे मिठुला लागि दिमग्याम चना, ताङगार, मोजे बामुबा । मिठु नोन थेतेन चोदे रतप ताजिन्मुबा कि थेसे आचासाम तिलाइ आचामुबा । चुह्राङ लासि थेनि ङ्हि डिक्पा ह्रो दोनिजि । 

तिरेकुनु गोपालसे थेजि कि सर्कस कम्पनि थेग्याम स्यान्दो सहररि निबाकेन मुला । थे क्रासिकेन ह्राङला आमातेन निजि ओम थेसे पाङजि, ‘आमा ङादा मोहर गि पिन्गो, ङा मिठुदा ग्लुसि बाला । थाहा आरे थे खानाङ निसेला मुला । ओम ङाइ थेदा खाराङ लासि म्राङम्याङला ? थेए नोन ङादा आम्राङमाहेन्से क्रासेला मुला ।’

आमासे सम्झप लाजि, ‘लाइनु, मागारसे खालाइदा माया आला । थेम ल्हानान चकचके ताला । चुरि खासि मुतेबादा ख्राप्सेला मुला, आतोबा ताम थेतोसेला मुला ।’

तासाइ आमासे सम्झप लासि पिन्बा तर्कजुगुसे थेफिरि खाजिबाइ असर आलानि । थे क्राबारि चुजि । थेतासि आमा बाध्य तासि थेदा मोहर गि पिन्जि ।

मोहर गि सिक्का याङसि गोपाल दङग ताजि । थेसे मोहरगिला सिक्कादा साप्रा फोर्सि ल्हानान टल्कप लाजि । ओम मिठुदा ग्लुबाला लागि थे ब्राजि तासाइ मिठु थेरि आम्राङनि । गोपाल ल्हानान दुखि ताजि ओम थेसे म्हान्जि, ‘मिठु ह्यार्सि खानाङएमि आनिनि ? मागारला दोप्तादा मोहरगिला सिक्का उन्सिकेन गोपालसे बिजि, ‘साप ! मिठु ङादा चुङस्ह्युला ?’

दोप्तासे सातान थेदा मिठुतेन क्लाङचिबातेन ख्वाचिबा म्राङमुबा । थेतासि थेसे ङेसिकेन पाङजि, ‘दोसिला रेम खाजि बिसाम मिठु एदा पिन्सेला मुला ।’

गोपाल निरास तासि ब्राजि ओम मिठु क्यार्से जासे म्हाइबारि चुजि । थे मिठुदा म्हाइबारि चोदे कोहोरेगि ताजि कि थेदा स्यान्दो तिलाइ ताम डान्बारिन आखानि । थेदा पटक्कान थाहा आतानि कि थे चितुवाला खोर ङामरि दोजिन्बा मुला । चितुवा कुटिसि न्हाङरि म्हेरचिमुबा । गोपालदा खोरला ङामरि रापचिबा म्राङसि पन्जा माङग्यार तेजि ओम गोपालदा चुङबा बाङ लाबारि चुजि । गोपालमि स्यान्दो ग्लारिक्यार च्याचिबा मुबा । थेदा तिला थाहा तागाइ ओन्छ्यान चिुतुवाला पन्जा थेला या ङामरि दोजिन्बा मुला । चितुवासे थेला या चुङसि छेङकेन लाजिन्बा मुबा कि थाहा आरे खानाङग्याम मिठु तिक्खुरि चितुवाला पन्जाफिरि छ्योङजि ओम पन्जा ख्राप्बारि चुजि । चितुवासे आर्कु पन्जा तेसि मिठुदा चुह्राङ लासि घाइते स्होजिकि थे थेरिन गुर्जि ओम बाङसे क्रिङबारि चुजि । मिठुला चु हालत म्राङसि गोपालए क्राबारि चुजि । ङ्हिनोन क्राबा थेसि म्हिजुगु छ्योङसि खाजि, थेरि दोगामा म्राङजि कि मिठु बेहोस ताजि गुर्जिमुला ओम गोपाल क्राजिमुला । मिठुला पो तुरुन्त सफा लाजि ओम मलम ल्हागाब लाजि । तिलाइ दुइलिच्छा थेला होस खाजि । थे गोपालला लिरिक्यार मायालु दृस्टिसे च्याबारि चुजि, मानतिले बिबाकेन मुबा दारे तिल्दा क्राला ? ङाम ठिक ताजिन्बा मुला ।

ल्हानान रे मलम पट्टि लाचिजि ओम लिच्छारि थे फान्जि । गोपाल दारेम सातान खामुबा ओम थेदा गेङ ख्वामुबा । 
लिच्छारि कम्पनि निबा दुइ खाजि । गोपाल ल्हानान दुखि मुबा । थे मिठुला खोर ङामरि राप्सि मिख्लिसे प्लिङबा मिसे च्याबाकेन मुबा कि मागारला दोप्तासे खासि पाङजि, ‘यदि एसे मिठुदा याङजि बिसाम तिला लाला ?’

गोपालसे बिजि, ‘ङाइ थेदा ह्राङतेन बोर्सेला मुला । थेतेन क्लाङसेला मुला । थेदा ह्राङलान बोरि ख्वासेला मुला, स्यान्दोम तिला रो ?’

दोप्तासे पाङजि, ‘ज्याब ताम हिन्ना, ङाइ एदा मोहर गि सुताइ आकिन्ना एदा मिठु पिनसेला मुला ।’

गोपालदाम राज्य याङबा च्योच्यो ताजि । थेसे मिठुदा कुरि थोजि, तासाइ मिठु छ्योङसि सारि दोजि ओम थेला लिच्छा लिच्छा ब्राबारि चुजि । ङ्हि नोन क्लाङबान रमाइलो लाबान दिमरि दोजि ।

दोःबा : यकिना अगाध