ओन्माह्रि ङामरि जाजा नाम्सा गिक मुबा  । थे नाम्साह्रिला ङामरि मुबासे तोबा सामान किन्बारि थारेङ नितोबा मुबा । चाइ म्हान्बा स्हेनोर चा आम्याङबा मुबा । थेनोन दुइ छेक्पा छबाला मुबा । स्योप क्रोबा दिनिसे सिल्बा क्युइ थुङगे म्हान्बा । दोङला क्रिपरि टि म्हान्बला मुबा । ओदेन दुइरि ब्लेखु कोला ङ्हिला आमासे खरबुजा चाइ म्हान्ना । ‘आमाचु क्रोबारिम खरबुजा चा म्याङसाम कादे ज्यासेला ।’ ओदे ताम थेमा ग्रेन ब्लेखु कोल्से हिन्नोम आमा कादे सित्तल तसेला दोसिम खरबुजामि स्युक केकेसेला वा.... । जाजा ब्लेखु कोल्से आहा खरबुजामि वाला क्युइ नोन क्युइ मुबा चना चना लासि चमाम कादे ज्यासेला ।  लु ले आमा चाइ म्हान्जि ।

आमसे सन्तोष ठोङजि टाङगा तेजि बोगाल ङि से च्युइ यारि पिन्जि । निउ किनिउ खरबुजा किन्सि बगाउ । ओदे बिसि आमा दन्द लाबा चुला।

ग्रेन ब्लेखुसे जाजा ब्लेखुदा पाङजि ‘था मुला ह्राङ बिमा ग्रेन म्हिदा मान सम्मान लातोला । एमि जाजा मुला योनाइ तला निउ आले एसे खरबुजा किन्सि बगाउ ।’ चु ताम थासिगेन जाजा ब्लेखुसे पाङजि ‘एदा था आरे ? जाजा म्हिदा माया लातोला बिसि ? दोसिम ङामि जाजा मुला ज्युइबा मुला । जक्कि सुत्तन माया अदामु? ङादा गे कुल्बारि आनि ङामि खरबुजा किन्बारि ।’

चु ङ्हिलान ताम थेसी टिबा आम्दा बोमो रेजि दिम न्हाङग्याम क्रिङकजि ‘योना याना ङ्हिनोन निउ । एनि ङ्हिनोन ब्लेखु मुला ताम जे ल्हाना पाङबा गे तिलाइ लाबा आहिन । योना ङ्हिनोन निउ । आमला ताम थेसि लिनोन फुप्के लाबा पहरा नाम ताइके लाबा खसु दोसि लि ग्युरु लासि निजि । 

थेनि ङ्हि ब्लेखु चुते दोना गि ओदे ह्रेङबा ग्यामरि गिसेम गिनोन ताम नोन अपाङजि । ताम पाङबारि समेत ब्लेबा खाबा ङ्हिदान । ब्रामा ब्रामा क्यार्से ग्रेन नाम्सारि दोला। 

फाट ग्रेन बु ह्वारा ख खु तेन फलफुलमि गादे गादे म्राङला। ङ्हिलान सेम फुर ताङला । ग्रेन पाटा बुरि निजि । बुरि बुला दोब्दा गे लासि टिबा म्राङला । ब्लेखु ज्योज्योआले खोङ राप्पा म्राङसि ङामदेरि खासि ताम पाङबा चुला । ‘ओ आले ङ्हि एनि तिला किन्बारि खाबा पाङगोम?’ ङ्हिसेन सुङ आ ओर तिल्दा बिसाम ज्योत्से आलेसे पाङगाइ आलेसे ज्योत्से पाङगाइ च्याला । कुटिसि टिला । ताम अपाङबा म्राङमा बुला दोब्दादा बोमो रेला । ग्रेन काइ लासि क्रिङला ‘एनि तिल्दा खाबा ? ताम आपाङ? ओदे दुइरि ङ्हिसेन छ्याम पाङला ‘ङानि खरबुजा किन्बारि खाबा ङान्दा ग्रेन ज्याबा चिप्पा खरबुजा बाउ  ।’ बु ला दोब्दासे खरबुजा थुनिला । छिन गिक रिन ग्रेन चिप्पा खरबुजा बाला । न चु खरबुजा बोगाल ङि ताजि । टाङगा पिन्जि । खरबुजा ब्लेखु ङ्हिसेन ताबारि अम्हाइजि । दोसि जोक रेसि क्रिङजि  ‘न खरबुजा आतो कि तिला ?’ ओदे बिबा ब्लेखु ङिसे खरबुजा ताला । 

दोसिन समस्य खाजि खरबुजा खाल्से थोसे उफ्फ । ज्योत्से आलेसे थोगाइ आलेसे ज्योत्से थोगाइ । ङ्हिनोन थेन तला ।

ब्लेखु ग्रेनसे जाजा त पाङला ‘लु आले चु खरबुजा भकुण्डो क्लाङसि क्लाङसि बोर्गे । एसेन पुइआतो ङाइनोन पुइ आतो ।’ ब्लेखु जत्सेनोन हिन्बा म्हान्जि थोबाला दुखसे भकुण्डो क्लाङबान बोर्गे बिला । ङ्हिलान सल्लाहसे भकुण्ड ह्राङनोन लेर्बासे छेप्पागेन बाला । ओदे ह्रेङ्बा ग्यामरि यारि आथोना कुल्सिगेन बाला । दिमरि दोकला । 
ब्लेखु कोला ङ्हिसे तिरेममान आमा .....आमा...... च्यागोले खरबुजा बाजि दरेम चु क्रोबारि सित्तल तना चतोला च्यागाउ ले आमा । एसे बिबा ह्राङबान ग्रेन ज्याबा चिप्पा बाजि । आमा योना खाउले चतोजि । एकोहोरो क्रिङमा आमा हाङसु बसि खरबुजा क्लेबारि खाला  । च्यामा ग्रेन ज्याबा चिप्पा खरबुजा म्राङमा सेमनोन सित्तल तला । बेनानला लि ह्याल तला । थे आमदा तिला था खरबुजा कुल्सि बाजि बिसि । हाङसुसे खरबुजा क्लेमा वाप वाप्पा क्युइ सरि ब्लुक ङ्हेला । 

लु चाउ खरबुजा । खुकु बेनान सरि ब्लुक ङेजि खरबुजाला फिमा जे तला  । खरबुजा चा आम्याङ। ‘आम्ला बोमोसे सिमा वाइला । काइ ग्रेन लासि क्रिङला । एन्ना बुद्धि म्राङमा ङा हि छेजि । क्लि चाउ दरेम ब्लेखु तामा ह्यान्देम चा आम्याङ छुइ आम्याङ । ब्लेखु ज्योज्योआले ङिहनोन ब्लेबाला परिणाम म्राङसि सेम खिन्ना लाला। 
काभ्रे