गोर्कि खोपोङ बिबा हयुलरि ग्रेन ग्रेन खिमला सहर मुबा । थे खिमरि छ्योइकु थेन वाङजु मिन लाबा म्हि टिसि खाबान मुबा । छ्याम टिबा ल्हानान दिङ तासि जिन्बा मुबा । थे ङ्हि आस्याङ कोन हिन्ना । खोपोङ विशेष लासि बाइ खिमला ग्ला हिन्ना । तासाइ दाते फिरक्र्याप ग्ला ग्लाग्याम ल्हाना स्यान जातिलानोन खिम ताजिन्बा मुला । थे गुङरि छ्योइकु थेन वाङजुनोन हिन्ना । वाङजुला आमा नोन मुबा । कोन जाजा दिङला मुबा । डोबाला ताङरि अदर्श ज्योति बोर्डिङ स्कुलला कक्षा १ रि डोबान मुबा । आस्याङनोन बागिश्वारि कलेजरि ११ रि डोबान मुबा । लोप्खाङरि डोबारि निमा सुत्ताइ आस्याङ खालाङ निजि बिसि म्हाइबा मुबा वाङजुसे ।
आस्याङदानोन लोप्खाङरि निमा खाइमा म्राङला ह्राङ ताबा मुबा । आस्याङला स्हयोरि डोबारि नितोबा । कोनला बिसाम दिनिरि मुबा । थे ङ्हिला डोबा दुइ ल्होल्हो मुबा । वाङजुदा वाङजुला आमासे सनिबा किनिबा लाबा मुबा । आस्याङ थेन कोन बिसाम दिनिला ४ बजे लिच्छा चेख्खेन ह्रुप ताबा मुबा । थे दुइरि आस्याङ खाइ निजि बिसि ङ्योइबा मुबा । आमासे दिमरि मुला बिसि दिमरि खामा आरेसाम बोमो खासि दिगु आचाना टिबा मुबा । आस्याङ गेग्याम खासि म्रापरि राप्सि करवाति बिमा फुर ताङसि बाक गाप्पारि खाबा मुबा । खालाङ निबा बिसि लि न्होङना लाबा मुबा । आस्याङसे एदा चाबा स्हे पसलरि ग्लुबारि निबा बिसि खाप्से गोनग्याम तेसि पिन्मा फिरफिर ताङबा मुबा । आस्याङसे बाबा खाप्से कुटुक कुटुक चासि टिबान मुबा । थे दुइरि आमासे खाल्से बाबा कोला बिसि ङ्योइमा करवाति आस्याङसे बाबा बिसि पाङबा मुबा ।
चेगाइसे आस्याङसे करवाति पाङबा मुबा । कोनसेनोन आस्याङदा करवाति पाङजि । करवाति कोन थेन करवाति आस्याङ बिसि पाङबाला मुबा ङ्हिसेन । आस्याङदा कोन अरेना अताबा मुबा बिसाम कोनदा आस्याङ अरेना अताबा मुबा । ह्रुप तामा सत्तान ग्राम्बारि च्योबा मुबा वाङजु । मायासे ग्राम्बारि च्योक च्योकनोन लाबा मुबा आस्याङसे । वाङजुला चाङबा नेबाला काइसे छ्योइकुदा खान्दामान निसाइ न्हाब्याङरि थेखाबा मुबा । थेराङनोन लासि रे निबान लाजि । थे दुइरि क्यार वाङजु खोपोङग्याम बोदिरि ल्हेबा तामनोन मुबा । तिल्दा बिसाम बोदिरि वाङजुला ह्राङलान दिम स्होबाला मुबा । वाङजुसे ह्याङ निमा करवाति आस्याङनोन छ्याम बोर्ताेला ह्या आमा बिसि ज्यार्दि ग्योइग्याम पाङबाला मुबा । आमासे ङोसि आबोरबा बिमा बोमो खासि काननोन आचाबा मुबा । बोर्ला बिमाम चाङबा काइसे नेबा मुबा । आस्याङदान कोन दिम ल्हेला बिसि सुर्ता मुबा । कोनदानोन आस्याङ बोर्ताेला बिबा सेम ल्हाना मुबा । तासाइ आस्याङ ब्रिबा डोबासे गाङसाल चेख्खेन ताबा मुबा । थे तासि छ्याम ताबारि आताबा मुबा । ओन्छ्यान थे कोनदा तिला थाहा ब्रिबा डोबासे लासि छ्याम आनिबा बिसि । थेराङ ताना तानान कोनला कक्षा १ ला परिक्षा ताजि जिन्मा ल्हेबा बिसि ताम ताजि । आस्याङ खोपोङरिन टिबा ताजि । कोन ल्हेबा ताजि । आस्याङसे खोपोङ हेन्से बोदि दोना गाडिरि छ्यामनोन सानिजि । बोदिरि जामा कुनु छ्यामनोन टिजि । दारेम ह्राङनोन चुरिन टिला है करवाति आस्याङ पाङजि । आस्याङसे उम.....बिजि ।
वाङजुदा आमा बिमाइ ल्हाना आस्याङ तोबा मुबा । तासाइ थे हेन्से थारेङ टिदोबा ताजि । आस्याङसे पसलसे चाबा स्हेकादे ग्लुसि बासि खाला बिसि लुसि खोपोङरि खाजि । तिल्दा बिसाम कोन छ्याम निबारि क्राला छार लोप्खाङरि निबारि आङयान बिसि । आमाला फोनग्याम करवाति आस्याङ खालाङ निबा बिसि फोन लाबाला मुबा । थे दुइरि आस्याङसे ज्यानालासि लोप्खाङरि निउ, ब्रिबा डोबा लाउ ङा एदा चाबा स्हेनोर ग्लुबारि निबा एता ताङबा स्हे आस्याप्जि स्याप्मा बासि खाला बिसि पाङबा मुबा । ङादाम दातेन तोला पाङजि । दातेन आहिन न्हाङगार बासि खाला लाउ पाङजि । फुरफुर ताङसि न्हाङगार बगाउ ह्या पाङसि फोन थान्जि । आस्याङदा कोनला चाङबा काइसे करवाति आस्याङ बिबा वा ह्राङ ताबा मुबा । कोनदानोन करवाति कोन बिसि खाबा वा ह्राङबा ताजि । ङ्हिदान गिसेम गिला ङ्हाच्छा निबा रेकादेसे फेतफेत छोर्ना लाबा मुबा । थे तासि करवाति कोन थेन करवति आस्याङ रेरेरिन ह्रुप ताबा ताम लाला ओेम ह्रुप नोन ताला ।
तपाईको प्रतिक्रिया दिनुहोस