आमा... आमा... साम्देन क्राजि । सारि ब्लाङगुर्सि बोल्सि बोल्सि क्राजि साम्देन । थोबोक्योङ, गोक्याङ स्राप्राला बुलबुल मख्खुन ताजि । क्राउर जा बुटुङटुङ छ्योङजि दिमपट्टि । साम्देन ग्रेनग्रेन काइसे प्रेछेन्सि क्राबाला क्राबान लाजि । खाइमाइ चुह्राङ लासि आक्राबा जा क्राबा थेसि साम्देनला आमा चोनलोङसि छ्योङगाजि ।

‘अहिन तिगा ताजि ? खाल्से तिगा लाजि चुदा ? साम्देन सारि बन्डाङ बन्डाङ बोल्सि क्राबागेन मुबा । ङाच्छागेन छ्याम क्लाङसि चिबा क्राउर जा थेलान दिमला खाला गाप्पारि निसि लाबा खाबा पट्टि दोजिबा मुबा । आमा ङामरिन दोगाबातेन साम्देनसे हिक्कु डुइबान आमादा बिजि, ‘आमा ङाला फिरवाति ।’

‘तिगा ओम फिरवाति ?’ आमासे ङ्योइजि ।

‘क्राउरसे यो लाजि ङाला ।’  

डु दिङला साम्देनदा फिरवाति क्लाङमा आउदिन सेम ताङबा मुबा । फिरवाति खाइमादाम्ममान आमाजासे मागाइला डोँटला बाला स्होसि पिन्मुबा । दिनि गाल्बान निबा ङ्यासे पायन, गाङरि मुबा साम्देला दिमङाम न्हुपपट्टिला गाप्पारि राप्सि फिरवाति क्लाङमा साम्देनला सेम फुरफुर ताङमुबा । तिरेदा गोरगि फिरवाति स्होबा गे आमाजासे लासिपिन्बा मुबा । बजारला क्लाङबा स्हे साम्देनसे म्राङम्याङबान आरेबा । फिरवाति आस्यासाम साम्देनसे सेसि आसेना फ्युफ्यु ह्राप्मुबा । तिगादा बिसाम फ्युफ्यु ह्राप्साम लाबा खामुला, लाबा खामा जे फिरवाति स्याला बिबा ताम थेदा आमासे सुङमुुबा ।

क्राबान लाबा साम्देनदा आमासे बुलबुल ताबान ख्रेन्जि । ‘चुह्राङ लासि सारि बोल्सि क्रालोम ? ङाला कोलादा ङाइ स्यान्दोन स्होसिपिन्ना म्हाले ।’ आमाजासे पाङजि ।

‘आहिन ङादाम थेनोन तोला, दारे ङा क्राउरतेन खाइमाइ आक्लाङ ।’ साम्देनसे जिद्दि लाजि ।

कोलाला जिद्दि म्राङसि आमासे वाम्जि, ‘ए याक्कर गि क्लाङलोम ? ह्रो आतो एदा ? फिरवाति स्याबारिम लाबा खातोला । लाबा खाबादा म्हेन्दो ङि डिक्सि फ्युफ्यु ह्राप्साम खेप्पा लाबा खाला दान्देम फिरवाति ज्याना लासि स्याला । बरु निउ क्राउरदान चुरि ङ्योइसि बगाउ । ङाइ एनि ङिदान फिरवाति स्होबा लोप्सि पिन्ला ।’

फिरवाति ब्यान्सि यार्बा क्राउरदा ङ्योइबारि सेम आरेना आरेना निजि साम्देन । सारि बोल्सि लिक्योङ साप्रा ताबा मिख्लि मिरि आखारजिमान साम्देन यासे लि फ्याबान कोलेसे कोलसे क्राउर मुबा ग्लारि निजि । फिरवाति फिरिरि स्याबा म्राङसि ताङजिबा क्राउरला क्वानरि ग्याप पट्टिसे प्लानछेङमा क्राउर ग्याप्से फ्लिक दोजि । साम्देन म्राङसि फिरवाति ब्यान्ला बिसि थे यार्गे लाजि । साम्देनसे बिजि, ‘ब्रानोले ङान्ना आमासे याङदा फिरवाति स्होबा लोप्ला रो खाउ ।’ 
‘हिन्बान ?’ क्राउरसे ङ्योइजि ।

‘हिन्बा ब्राउ, क्यो थेरि ङान्ना आमा ।’ क्राउरसे च्याचि । साम्देनला आमासे यासे खाउ खाउ बिसि ल्हादप लाजि ।

तोल्माला फिरवाति सारि ब्याङसि ङिनोन बामरि हाप्ख्वाइसि आमा मुबा ग्लारि दोजि । साम्दोनला आमासे ङिदान फिरवाति स्होबा लोप्चि । ङिसेन ध्यानपिन्सि च्याजि ।

‘लो दारेम एनि ङिसे स्हो योम ।’ साम्देनला आमासे पाङजि । ङिसेन स्होबारि वाङजि । आमाजा च्यासि चिजि । साम्देन थेन क्राउरसे च्यानाच्याना फिरवाति स्होजि । दारेम स्याला कि आस्या परिक्षण लातोजि । स्याबा आस्यबा च्याबारि लाबा खाबा गाप्पारि निजि ङिनोन । बिबाइह्राङ नोन गाप्पारि दोबातेन ङिलान यारि मुबा फिरवाति स्याजि फिरिरि... ।  ‘आहा ! स्याचि होइ, स्याचि ह्याङला फिरवाति हि हि... ।’ ङिनोन ताङजि । ह्राप्पारि तिजि फ्युफ्यु निनोन डिक्सि । 
कोन्ज्योसोम गाउँपालिका–२ बागरगाङ, ललितपुर ।