नोर्बु जत्तुगु हिन्सेन छ्यार्बा खालला मुबा । थे योना ङ्हाज्याङ आताबा खालला मुबा । थेला काङ या चेक्खेन आहिन, स्या नाख्रुनोन जाजा खालला मुबा । क्योइमा ओइट आछ्योबा मुबा । तासाइ प्लिक च्यामाचा पटक पुटुल्बान म्राङ्बा मुबा । नोर्बु दिङ गि आछ्योचिमान ब्राबा चुबा मुबा ।

नोर्बुदा क्लाङ्बा स्हे ल्हाना तोबा मुबा । थेसे म्राङ्देबा स्हे नोन साम्तोबा मुबा । ङ्हाज्याङ्से लाबा गेकादे थेसे लातोबा मुबा । थेसे लामा नोर्बुदा च्याबा थर्का म्हेमेचा ब्लाप्सि जिन्बा मुबा । नोर्बु छार्सि हाजि । थेसे डु दिङ ताजि । लोप्खाङरि पुइबरि चुजि । थे लोप्खाङ्ग्याम्से यार्सि हाबारि माइजि । म्हेमे चासे वाम्सि वाम्सि लोप्खाङरि सापिन्जि । थेदा वाम्बाला लागिरि थेला क्लाङ्बा स्हेकादेनोन जोर्सि पुइजि ।

नोर्बुला दिम ङामरि ख्रिनला दोङ मुबा । छेप्पा लारि ख्रिनला बाकदे हार्सि फ्योलोङ्लोङ ताइबा मुबा । ख्रिनला कोप्स्योलकादे नोन हाक्होक हासि ताइबा मुबा । तिरेकुनु नोर्बुसे ख्रिनला बाकादे फ्योलोङ्लोङ लसि ताइबा म्राङजि । नोर्बुसे थेएनोन थेराङ लासि छ्योङ्सि फ्याङ्गे बिजि । थे ख्रिनला दोङरि क्रेगे बिजि । नोर्बुदा म्हेमेचासे ल्हानान वाम्तोजि । तिक्दामान लासाइ आतानि । थेदा म्हेमेचासे ख्रिनला कोप्स्योलला फिर्वाति स्होसि पिन्जि । ख्रिनला थोङ्रि फिर्वातिला काङ क्यासि लाबारि स्याना लाजि । फिर्वाति फिरिकरिक स्याजि । नोर्बु ल्हानान ताङ्जि । थेसे चाबा थुङ्बा ख्लासि फिर्वाति क्लाङचिजि । कुरिकुरि बिबान छ्योङ्ब्राजि ।

नाम्दुङ ङ्ह्याकुनु  ङ्हाज्याङ लाबा हाजि । थेला फिर्वाति बाङ्से स्याजि । नोर्बु कुरिकुरि बिसि छ्योङ्जि । फिर्वाति लाबासे बोर्जि । नोर्बु क्राजि । थे फिर्वाति ह्वासि छ्योङ्जि । फिर्वाति बुन्हाङ्रि बोर्जि । बुरि माकाइ ओदेओदे न्होजिन्बा मुबा । नोर्बु माकाइ न्हाङ्रिन निजि । ‘ङाला फिर्वाति ! ङाला फिर्वाति !’ नोर्बु क्रिङ्सि क्रिङ्सि छ्योङ्जि । लाबा ङ्हाज्याङ ङ्हाज्याङ हाजि । नोर्बु साबुन्बारि आहाम्ना हिकहिक ताजि । नोर्बु लिच्छा म्हेमेचासे स्याप्सि हापख्वाइसि बाजि । दिमरि बासि मे फुइसि डोइ हाना लासि पिन्जि । नोर्बु लोङ्सि ल्होकलोक दार्जि । थे हिन्से नोर्बुसे फिर्वाति हाइमाइ आक्लाङ्नि ।