ओन्मा दाङमोला ताम हिन्ना । नाम्सा गिकरि मङकादे लेसि खजिम । थे मङकदे म्हिला दिम ङ्याछाङ्देन चिजिम । निरेसोमरे लिच्छा म्हिला कानखु ब्यान्सि चबाइ थाल्दिजिम । म्हिदा याकर दिङ योबा कानखु मङसे तिरेमन चजि । बुह्वारिरि मिन्बा अन्ननोन म्हुनखिमान जिन्नलाजि ।

म्हिला कोलाकदे चुङबान ह्रोला कोलाकदेदा क्लाङबा से सोबाइ बोर्जि । म्हिला कोला क्रमाम मङला कोलामा खितिति ङेबा मुबा ।

चाबासेजे अहिन कोलाकदेन बोर्पासेम थे समस्या समाधान लबारि नम्साबा छ्याप ताजि । मङदा स्युर्बा अक्कल तिक ताला बिसि तम लाजि । नाम्साला गन्बासे निर्णय लाजि–औंशील मुन्से मङ स्युर्गे ।

मङदा स्युर्बा अखम्याम लिच्छा मिन था याङयाम मङसे तिलाइ लहाम्ला । होचुथे मङदा स्युर्बाइ निबाकदेला नाङम्हिन थान्जि । खलाइला बोम्पो, खलाइला डोम्पो । खलाला  लामा, खलाइला छामा, खलाइला तवर, खलाइला नमि । खलाइला नकि, खलाइला महि ।

मोक्कोनसेन नोबा नोबा सिन बजि । सिनला थोबोरि च्याटि युजि । ल्हानान थेरङबा च्याटि सोजि । सिङला मुखुन्डो वान्सि मङला बस्तिरि वाङजि । कोइसे लाबा राब्जि । कोइसे झ्याम्टा राब्जि । कोइसे मादल, कोइसे डम्फु राब्जि । कोइसे कुरि, कोइसो तो । होसेम तिछरमान च्याटि म्रासि मङला बस्तिरि आक्रमण लाजि । गोजा, लाज्यानोन यारि थोसि निजि मुखुन्डो वन्बाकादे । दोबदोब्बा दुइरि चुरङतामा मङकदेला ब्ला मजि । मङ नम्सा ख्लासि याजि । मङ यर्मा कोइ कोइ म्हिकादेम घाइतेदेन ताजि ।

मङदा स्युर्बाल नङगरङ्यान्से नाम्साला मिकदे तङजि । चुचापट्टि मङला बिसम दुखला दिन तिजि । तितरिवितर ताबा मङकदे छ्यामह्रुप ताबा आखाम्नि । मङला गिक शक्ति बिवा चअम्याङलाइनोन असिबा मुबा । ल्हुइचाम घट्तिसि जतजत तसि निबामुबा । थेरङलेन चबासे चअम्याङमा थेन्ना ल्हुइ जतजत तसि निजि ।

खलाङनोन चबासे आस्याप्पासेम थेनि फोहोरला डंगुररि वाङजि । चाबासे माइजि । फोहोरला नइबासे चसि ल्हुइ ग्रेन अतानि । चोरङलेन दुःख याङबाकादेला फोहोररिन छ्यबह्रुप ताजि । गिकसे स्यानदा ङोनोन असेना जत तबा म्राङसि निनोन बेनान क्राजि । क्रासि समस्याला समाधान अतासेदा मुबा । दरेम खराङले ग्रेन तला, खराङले ल्हुइ चलाइदि, चुनोन ताम निसेन लाजि ।

गिकसे पाङजि– याङ ग्लाखिसे स्यान ग्लारि निबादा बेनान दुइ गेबा मुला । चोराङलेम याङसे ह्रोकादे स्याबआखाम । थे ताबासे याङसे ह्रोकादे छ्यबह्रुप तबादा प्लेन सोदोला । थे प्लेन योनायोना फ्याङला । थेसेलामा याङसे ह्रो नोन स्याब्ला । म्हिकादेदान सेबा हम्ला । थेला ताम जिम्बासेम स्यान मङसे बिजि–रिल्बा आखाम, फ्याङबाला ताम ।

ल्हाना राङबासेजा प्लेन सोबा ताम तङजि । थे मङसे ह्रोकादेला ह्रोसे दिनम्हुन लसि प्लेन सोजि । गोर्नि प्लेन तयार तजि । गोर्कि स्योरि उडाइतिबा मिल्तिबा । स्यान म्हुन्से उडाइदिबा मिल्दिपा । दिन्से फ्याङबाला मिन नप्राङ, म्हुन्से फ्याङबाला मि पङलिङ ।

मङसे थेनोन प्लेन हेसि ह्रोकादे माइजि । मोक्कोन स्याब्जि । मोक्कोनला ग्रोइ अन्सार म्हिदा साइबा ताम तजि । प्लेनरि हेसि मङकादे म्हिदा साइबाइ निजि । दान्देदा याङला रुप जतथेन मुकाइ बिसि मङकादे म्हिला दिमरि प्लेन हेसि वाङजि ।

कोइ यारि ल्यान्ड तजि, कोइ पोररि । कोइ कानरि कोइ खुरि । कोइ केकेपा सेरि । कोइ थाङहाबा सेरि चिजि । पङलिङ प्लेनरि हेसि निसि म्हुन्से म्हिला का स्युब्जि मङसे । म्हुन्से दिन्से चोरङले मङसे म्हिदा सताइदिजि । दान्देन चोरङले ल्हानान म्हि आखाम्बा तबा मुला ।