गाङ जोरि गिक्खे ग्रेन दोङ मुबा । थे दोङ जोरि याखारगि सिन्धुक मिनला चरा चिबा लामुबा । थे चराला क्लि म्हार दोमुबा । तिरेकुनु गिक्खे सिकारि सिकार क्लाङ्बारि थेरि दोजि । चरासे सिकारिला ङ्हाच्छा क्लि स्योर्जि । थे क्लि म्हार दोजि । चुराङ्बा म्राङ्सि सिकारि छक्क ताजि ।
थेसे सेमसेमरि म्हान्जि, ‘आपुइ चरा सेसि ब्राबा चुथेबा दुइ ताजि तासाइ ङाइ तिनि दोना चुह्राङ्बा म्राङ्बा आरे । ङाइ खाचिबाइ चराला क्लि म्हार दोबा म्राङ्बा आरे चु चरादा तिलादाम्मान लासि चुङ्तोला । चुदे म्हान्छि थेसे चरा चिबा दोङ जोरि पासो जुजि । चरासे वास्तान आलाना पासो जुबा ग्लारि निसि चिजि । बिमाइह्राङ चरा पासोरि परतिजि । सिकारिसे चरादा देःबान (सजिलोन) चुङ्सि खोररि युसि दिमरि खाजि ।
दिमरि दोगामाहेन्से सिकारिसे म्हान्जि, ‘चुह्राङ्बा अनौठो चरादा ङाइ तिला लासे ? खालाइसे चु चरादा म्राङ्सि चुला बानि थाहा ताजि बिसाम ग्लेजा निसि पाङ्पिन्सेला मुला । ग्लेसे चु ताम थाहा याङ्सि ङादा आज्याबा लासेला मुला । बडु ह्राङ्सेन चु चरादा बोर्सि ग्लेदा पिन्बा ज्याबा तासेला मुला ।’ चुदे म्हान्सि सिकारिसे ह्राङ्सेन थे चरादा बोर्सि निसि ग्लेदा पिन्जि ।
चुह्राङ्बा अनौठो चरा याङ्सि ग्ले आउदिन ताङ्जि । थेसे ह्राङ्ला गेलाबाजुगुदा पाङ्जि, ‘रक्षकजुगु हिन्ना, चु चरादा ज्याना लासि न्हाउ । चुसे चादेदोना दानापानि पिन्गो ।’ ग्लेसे कुल्बा थेसि लोन्पोसे बिजि, ‘सरकार ! ङोनोन आसेबा चु सिकारिला ताम ङ्यान्सि चुरादा न्हाबाला तिगा फाइदा ? तिला तिनिदोना खाचिबाइ चरासे म्हार स्योर्बा मुला ओम ? चुराङ्बा न्हा खाइमाइ थेजि न्हा खाइमाइ म्राङ्जि । बरु चु चरादा ख्लाबान ज्याबा ताला ।’ लोन्पोला चुराङ्बा ताम थेसि ग्लेसे चरादा ख्लापुङ्जि ।
चरा मुक्त ताजि । चरा मुक्त तामाहेन्से ग्लेला म्रापरि निसि चिजि । थेरि क्लि स्योर्जि । चराला क्लि म्हार दोजि । चरासे ग्लेदा पाङ्जि– दोलोम ङा मुर्ख हिन्ना । थेलिच्छा चु सिकारि मुर्ख हिन्ना । थेलिच्छा ग्रोइ पिन्बा लोन्पो मुर्ख हिन्ना । चु मुतेबा गुङरि ग्रेन मुर्ख परिक्षण नोन आलाना ङादा ख्लाबा ग्ले हिन्ना । चुरि मुर्ख मण्डली जेक्खे ह्रुप ताजि । चुदे बिसि चरा थेग्याम फ्याङ्सि ह्यार्जि । ग्ले, लोन्पो, सिकारि थोम निजि ।
दोःबा : यकिना अगाध
तपाईको प्रतिक्रिया दिनुहोस