म्लाङताइ थेन फोङक्यान सेम डिक्पा ह्रो हिन्न । सत्तान छ्याम–छ्याम ब्रामुला । लोप्खाङरि निसाइ वत्तिरि क्युइ किन्बारि निसाइ छ्याम ब्रामुला । ह्रिरि रा, म्हे छाबारि नोन छ्याम नोन ब्रामुला ।

म्लाङताइला दिमरि आपा, आमा थेन थे जेक्खे ताबासे ल्हानान गे लातोबा मुबा । फोङक्यानला दिमरिचा आपा, आमा ओम नाना नोन मुबा । म्लाङताइ स्योरि ह्रिरि निसि छाङ्नाङ छे बासि आखाते दोना लोप्खाङरि निबारि आम्याङ्मुबा ।

फोङक्यान दिमरि क्यारनोन स्ह्योयाल ह्रो कादेतेन गुच्चा क्लाङ्सि दुइ पुइमुबा । फोङक्यान जागि ब्लेखु मुबा । ब्लेखुन तासाइ आपा थेन आमासे आम्राङ्ना लासि म्लाङताइ थेन ह्रिरि खाइमादाम्मान  ह्रोनोन निमुबा । म्लाङताइ थेन फोङक्यान ङ्हि नोन कक्षा गिरिन डोबाला मुला । थेनि कक्षा डुरि डोबान मुला ।

फोङक्यानला बिमा म्लाङताइला डोबा जागि ल्हाना ज्याबा मुबा । ङ्हि नोन छुट्टि जिन्बातेन दिमरि खाप्पाचा ङ्हाच्छा दोबा बिसि छ्योङ्सि खाबा लामुबा । दिमरि आमासे स्होथान्बा दिगु चासि ङ्हि नोन ह्रिरि प्रे निबा लामुबा ।

खाइमाम खार्बा ल्हाप्तेबा दुइबारि, खाइमाचा छे खान्बारि, सिङ थाबारि, राम्हे छाबारि निबा लामुला । म्लाङताइचा खार्बा बा दुइबारि ओम फोङक्यानच म्हे छाबारि ह्रिरि निजि । दिम मार्सेला ग्योइपेरोरि क्यार म्हे छाबा, बा दुइबा लाजि ।

दोइ छ्योताम्बा दुइरि छेतेर नोन छेसे खाबाला टिम । फोङक्यानला म्हे नोन ह्रि ग्याम थोन्बारि चुमुबा ।

छेतेरसे ‘तिला लाबा एनि ?’ बिसि ङ्योइजि । म्लाङताइसे पाङ्जि ङा खार्बा बा दुइबा ओम फोङक्यानच म्हे छागाबा । 

‘एचा गिख्खेन छे थाबारि खाबा हिन्ना ?’ बिसि ङ्योइजि । छेतेरसे ‘हिन्ना होइ ! ङागिन’ बिसि कासाल पिन्जि । थेनोन दुइरि फोङक्यान म्हे ग्याम दिरि मार ल्हागाप लासि म्लाङताइ थेन छेतेर मुबा ग्लारि दोगाजि । फोङक्यानसे खाला मुग्याम बिबाम छेतेरका टिम पाङ्जि । फोङक्यान औदिन क्लाङ्बारि ताङ्बा मुबा । फोङक्यानसे दारेम ह्याङ सोम ताजिम बोन्बो स्होबा क्लाङ्गे पाङ्जि । छेतेरसे लु क्लागेलोम पाङ्जि ।

म्लाङताइसेचा आक्लाङ बिसि पाङ्जि । ‘तिल्दा आक्लाङ बिबा ?’ बिसि फोङक्यनसे ङ्योइजि । छेतेरसे दोसि ह्याङ छ्यामनोन निवारिन म्हाले छिन्नाङ क्लाङ्गे, दोइ आछ्योसाम सोमसेन बा दुइसि पिन्ना बिसि पाङ्जि । छेतेरसे ओते बिमा म्लाङताइसे ह्या ताला बिजि ।

दिनि नुप्बारि तेमाल गाङ जोजोरि दोजिन्बा मुबा । दुगु, ड्वाफ्रे लाला दुइ मुबा । दुइ ह्रेङ्बा रे । म्लाङताइसे पाङ्जि ङाचा ङ्हा हा्रप्ला । फोङक्यानसेच ङा माला क्वान्सि स्याला पाङ्जि ।

छेतेरसेचा दिमरि स्या थेन म्ल्हाकान दाइसि थान्ला पाङ्जि । फोङक्यानसे छेतेरदा म्ल्हाकान दाइसि थान्को ङानि बोन्बो स्होसि खाला बिजि ।

छेतेरसे ग्याम कुनिरि जाजाबा ब्राङ स्होसि जेना लाजि । ब्राङ थोरि थाङ्सिङला बोस्योप न्हान्बा मुबा । ब्राङ न्हाङरि स्याथेन म्ल्हाकान दाइबारि चुजि । म्ल्हाकान कोसिङला न्हाङ्स्याला स्होजि । स्याचा खाले थुसि दुम्बु दुम्बु स्होसि दाइसि थान्जि । 

थे दुइरि म्लाङताइ थेन फोङक्यान बोन्बो ज्योसि खाजि । म्लाङताइचा रिनला गोबिरला ङ्हा स्होसि ठ्याक्को ठ्याक्को ह्राप्पान खाजि ।

फोङक्यानचा माकोला माला स्होसि क्वान्सि स्याबान खाजि । ड्याङको बोन्बो ड्याङको बिसिमामा ।

छेतेरसे म्ल्हाकान थेन स्या फान्ते ल्हाप्तेला बारि ख्योसि पिन्जि । छेतेरसे ह्राङ्दाइ नोन ख्योजि । सोमसेन काइ गिरिन बिजि, ‘स्याजि बोन्बो स्याजि ! स्या थेन म्ल्हाकान चाजि ।’