‘चु पासाङला छोङ्खाङरि कादे च्योसि चिसे, मुरि फ्याङ्सि चु नाम्साला फिरि निसि बेनालान दिम दिम कोर्बा सेम मुबा, हालाइनोन ङादा किन्बारि आहानि ।’ चाङ्गासे हुइ तेसि पाङ्जि ।

याम्बु ग्याम्से सोमरे ङ्हाच्छा जेक्खे पासाङसे चाङ्गादा बोत्थाङ नाम्सारि बामुबा । चाङ्गातेन लट्टाइनोन छ्यामामान हामुबा । पासाङला छोङ्खाङसरि फेबाफेबा (थरिथरि)ला सामानकादे मुबा । थे सामानकादे किन्बारि ल्होलो ल्होलो नाम्साग्याम्से म्हिकादे हाबा निबा लाजिबा बेनान च्यासि चिजिबा मुबा चाङ्गा थेन लट्टाइसे । चाङ्गा थेन लट्टाइ याम्बुरि ओइमा जेख्केन ह्रुप ताबा मुबा । काडुपजा ङ्हाच्छा हेन्सेन हासि चिबा मुबा पासाङला छोङ्खाङरि ।

तेम्बा थेन लेम्बा तिनि आपातेन म्हेनिङ्लला सामान ग्लुबारि हामुबा पासाङला छोङ्खाङरि ।

तेम्बासे आपादा थे छोङ्खाङला दलिनरि फ्योङ च्योसि चिबा चाङ्गादा ओन्सि पाङ्जि, ‘आपा ङादा उ थे चाङ्गा ग्लुसि पाउले ।’

लेम्बासे नोन पाङ्जि, ‘ङादान तोबा ग्लुपिन्गो ह्या आपा ! क्याच्चा दिमला पेम्बासेम ङान्दा ओन्सि ओन्सि तिल्माहेन्देन चाङ्गा पुइजिन्जि ।’

थेबा कोला लेम्बादेन च्याङ्बा कोला तेम्बारिक्यार फ्लिक च्यासि पाङ्जि, ‘ह्या ह्या दात्ते ग्लुसि पिन्ना ङ्हाच्छारि फाल्गि, म्ल्हा, आङादा फ्याङ्गुलिङ ग्लुतोजि एनि ङ्हि रेच्छागि कुटिसि चिउ ।’

थेनिकदेला थे ताम थेसि चाङ्गा थेन लाट्टाइ ताङ्जि, ‘दारेजा बिसाम चु छोङ्खाङरि च्योसि चिआतोनि, आहा !’

काडुपनोन कागाजला रुङ्बा चारपाट्टे बट्टा न्हाङरि चिसि बेनालान ताम ङ्यान्सि चिजिमुबा । सेमसेमसे काडुपसेन पाङ्जि, ‘एनि ङ्हि चाङ्गा थेन लट्टाइजे निसि तिगा लासे ? एनि ङिला क्वाइ (साइनु) थुइना लाबारिम ङा आरेदे आताबा गा, तिगा ओम ?’

तेम्बा थेन पेम्बाला आपासे तोदे बेनान सामान ग्लुसि पोरे लासि च्योम्बोनरि युजि ।

‘ल्हाउ हाजिबाजा ताङ्बा दाम्गो’ छोङ्खेन पासाङसे पाङ्जि । पासाङसे बेनानदान मार स्यासि दाम्पुङ्जि । तेम्बा थेन लेम्बासे गोर ङि ङि दाम्जि ।

‘लट्टाइ थेन काडुपजा आतो ?’ छोङ्खेन पासाङसे ङ्योइजि ।

तेम्बासे लट्टाइतेन आपाला लिरि क्यार लोङबाह्राङ लासि च्यासि कोलेसे पाङ्जि, ‘लट्टाइ थेन काडुप आरेसाम चाङ्गा हाराङ लासि फ्याङ्ना लासे ?’

तेम्बाला आपासे ताम गोजि, ‘लु लु थेनोन स्यापिन्गो आसेम न्होर कादे ताजि, हिसाब लास्युगो ।’

चाङ्गा, काडुप, लट्टाइ, तेम्बा थेन लेम्बाला ताङ्बाला सिमा नोन आरे । थेनिकादे बेनान ह्राङ ह्राङ तोसोसे ताङ्चिमुबा । थेनिकादे बिमा ल्हाना ताङ्चिमुबा काडुप । तिगदा पाङ्साम स्यान्दो दुइरि काल्टाङ कुल्टुङ लासि खिल्सि चितोमुबा ।

होटेलरि तिगाइ चासि तेम्बा फेबे दिमरि दोजि । आपासे धोक्रो पुइजि । तेम्बासे चाङ्गा थेन काडुप थोजि बिसाम लेम्बासे लट्टाइ थोजि । घन्टा गिदे ब्रासि थेनिकादे थेन्ना नाम्सारि दोजि । दिम दोबातेन लेम्बा थेन पेम्बा स्यान्दो तिगाइ आच्याना चाङ्गा थेन लट्टाइदा चोसो दोबा हेसो दोबा लासि चाङ्गादा प्लास्टिकला तुन्बा मे तापिन्जि ।

चाङ्गादा थेराङ लासि ज्योसि (सिङगार पटार) म्राङसि ङामरि चिसि च्याजिबा लट्टाइसे फासुपसे पाङ्जि, ‘ओइ चाङ्गा ए तिनिम ब्योन ह्राङ कादे जेबा म्राङ्जि ।’

लाट्टाइला ताम थेसि चाङ्गा पेजि । थेनोन दुइरि लेम्बासे काडुप ब्लासि लट्टाइरि ख्वार ख्वार रिल्जि । दोसि चाङ्गाला पालो लट्टाइदा कोलेसे पेसि पेसि पाङ्जि, ‘ओइ लट्टाइ तिगा एसेम ङादा जेक्खे जेबा म्राङ्बा पाङ्बा ? दात्तेम एनोन कादे ब्योन दोबा छोर्जि ङादाम ।’

चुनि ङिला ताम तेम्बा थेन लेम्बासे थाआयाङ्साइ काडुपदा बिसाम बेनान था मुबा ।

काडुपला पाल पाङ्जि, ‘च्यागो एनि ङि तिनिहेन्दे लेङ दोजि । दारेहेन्दे एनि ङिला सम्बन्ध हाइमाइ आटाङगाइ पाङ्सि ङानोन छ्यामामा हाबा हिन्ना । हालाइला ताम आङ्यान्ना रेङ्बा दुइदोना एनि ङि  डिक्सि चिउ । ङाला मोलाम ।’

काडुपला ताम थेसि चाङ्गा थेन लट्टाइ गिसेम गिदा फ्लिक फ्लिक च्यासि ताङ्चिमुबा । तेम्बा थेन लेम्बासे लाट्टाइ थेन चाङ्गादा थुइजि । दिनि गाङग्यामसे ग्युरु फाप्जिन्बासे दोबोबो ताजिन्मुबा । थेकुनु चाङ्दा फ्याङना लाआखाम्नि । ग्ला गिरि तोग थान्सि पेम्बा थेन लेम्बा म्हेर्जि ।

चङ्गा थेन लट्टाइसे नोन दुःख सुखला ताम पाङ्सि म्हुन थाजि । स्ह्योरि पिङगाइ मुरि वाला होइसेर चाल्गाजि । लेम्बा थेन तेम्बा रेबातेन मि नाइबान चाङ्गा थेन लट्टाइदा होपदुइसि पाङग्यालरि फ्याङ्ना लाजि । चाङ्गा स्यासि स्यासि मुरि जाजि । चाङ्गा थारेङ थारेङ दोमा लट्टाइनोन ह्यार्सि निलाबा ह्राङ ताजिमुबा । काडुपसे थेनि ङिला सम्बन्ध थुइथान्बा मुबा । लेम्बा, तेम्बा, चाङ्गा थेन लट्टाइ ताङ्सि ताङ्सि क्लाङ्चिजि । काडुप बिसाम रेङसि रेङसि निजि ।