ङादा चिडियाखाना कोर्निबा सेम मुबा, खाइमा खाइमाहेन्देन । आङा स्विकृतिसे नोन निबा सेम लामुबा । निजा आम्याङ्मुबा । निबा सेम मुनामुनान । तिरेकुनु ज्योथेबा ईश्वरसे ङानि ङ्हिदा सुङ्जि, ‘ए ङ्हिदा ङाइ तिरे बोर्ला ।’

ङा ङ्हिसे ज्योथेबाला थे तिरेदा ब्रान्सि रे, ला, दिङ नोन निजिन्मुबा । हिन्बाम खाइमा ह्राङ्लान गेदिमला गेसे लामा, खाइमाजा नाबाछाबा तासि नोन दुइ दोन्आखाम्मुबा ज्योथेबासे ङा ङ्हिदा । थेजे आहिन्ना आङा स्विकृति ङा ङ्हिला लोप्खाङ बिदा आताना ओम होमवर्क थेन एक्जमसे लासि नोन चिडियाखानारि निआम्याङ्मुबा । दुइ पिन्आम्याङ्मुबा ।

ङाइ ज्योथेबाग्याम्से थेमुबा कि चिडियाखानारि च्यान, ल्हुन्दि, माकार, गैँडा, हुडि, ह्रिम्हि, पुख्रि, नामे, ताङ्गि, लाङ्बो, तावार, नाम्युङ, म्रावा, सिबु थेन तार्ङाह्राङ्बा स्हेकादे ङाम्तेसेन म्राङ्म्याङ्ला । ङादा थे स्हेकादे दात्तेन च्याबा सेम तासि खाजि । स्विकृतिसे नोन दात्तेन च्याबा सेम लाजि ।

बिमाइह्राङ तिरेकुनु योथाङ्मा आङा स्विकृति, ङा थेन ज्योथेबा चिडियाखानारि निबारि छ्यापताजि । ङादा ताङ्बा खाजि । आङा स्विकृतिनोन फुर ताङ्जि । फुर ताङ्बान थेसे ङादा सेजि, ‘याङ्जी, ह्याङ ङ्हिसे दारेम च्यान च्याम्याङ्बा ताजि ।’

ताङ्सि व्हा ? ङाला काङ सारि आतानि ।

योला चाबा आचानान ङानि सोम चिडियाखानारि निबारि थोन्जि । ङादा चिडियाखानारि खाइमा दोलाह्राङ ताजि । ओतेबा दुइरिन ङाइ आङा स्विकृतिदा प्लिक च्याजि । थेला मिसे नोन ङादा बिबाह्राङ छोर्जि, ‘ङाताइनोन एदाह्राङ नोन छोर्चिमुला ।’

चिडियाखाना हेराङ्ला जावलाखेलरि टिम । हेराङरि ङा दोक्छेबिमा ङ्हाच्छा दोमुबा । आङा स्विकृति नोन दोक्छेबिमा ङ्हाच्छान दोमुबा । चिडियाखानारि टिकट थासि न्हाङरि वाङबाबिमा ङ्हाच्छा ङानि सोमसे चिडियाखाना ङाम्तेलान गोर्गि होटलरि वाङ्सि तिलाइ चाबा स्हे चाजि । फो म्रेन्ना । थेलिच्छा ङानि सोम चिडियाखानाला टिकट थाबा ग्लारि निजि ।

टिकट थासि लिच्छा ङानि सोम गेटला टिकट चेक लाबा म्हिदा टिकट उन्सि चिडियाखाना न्हाङरि वाङ्जि । ज्योथेबासे आङा स्विकृति ङा ङ्हिदा ताङ लासि चिडियाखाना कोरो लाजि । थेन्हाङरि गोर्गि माकार आमासे ह्राङ्ला जाजाबा कोलादा कुरि थान्सि म्हिसे ह्राङ लासिन चेकाइसे ङ्हे ख्वासि टिमुबा । ङादा थे माकारला डान्बा दात्ते नोन आउदिन खामुला ।

चिडियाखाना न्हाङला लोलो लोलो ग्लारि टिसि क्यामेराग्यामसे फोटो नोन तेजि । थेन्हाङरि कोर्ना कोर्नान, फोटो तेना तेनान ङानि सोम ब्लापए ब्लाप्जि । आज्याना लासि ब्लाप्जि । ज्यागोन गाइना थेन्हाङ्लान गोर्गि टिबा सिल्बा न्हानरि ब्लाप्पा न्हाजि, ङानि सोमसे ।

लोप्खाङ बिदा ताबासे व्हा ? चिडियाखानारि आङा स्विकृति ङा ङ्हिह्राङ्बा जात्तुकुकादे खालाइ ह्राङ्ला आपा अमातेन, खालाइ ह्राङला ज्योतेन, खालाइजा ह्राङ्बिमा ग्रेन म्हिकादेतेन चिडियाखानारि कोर्बारि खाबा म्राङ्जि ।

छ्योना चिडियाखाना ख्युर कोर्सि ज्योथेबा, आङा स्विकृति थेन ङा फिक्र्याप थोन्जि ।

(चिडियाखाना कोर्निमा छ्योइ ग्याम्से ।)