पेम्बा दिङ ङिसला हिन्ना । थे जाक्गि कादालकुदुल्बा मुबा । थेला मिए टाम्बालटिम्बिल्बा काङ या नोन रिलरिल्बा मुबा । बर्थिङ सेन्टररि न्हाबा दुइरिन थेसे हेल्थि बेबिला प्राइज याङ्बा मुबा । थेला बिजा हेन्देला स्या आस्योप्नान छार्खाजि ।

पेम्बाला दिमला क्वारारा बाइकादेला दिम मुबा । थेला दिमला जाक्गि क्याथाङ स्या थाबाचाला दिम मुबा । थे दिमला कोला रोमन पेम्बाला प्ले ग्रुप हेन्देला क्लासमेट मुबा । थेतासि पेम्बा थेन रोमन आउदिन डिक्बा मुबा ।

स्ह्यान्दो बाइकादेसे पेम्बादा रोमनतेन छ्याम थाक्लाङ्गो बिजि । रोमनला दिमरि निबारि आता बिजि । रोमनदा दिमरि बाबारिनोन आता बिजि । पाङ्बा आङ्यान्साम थेन्ला कोलाकादेतेन छ्याम क्लाङ्बारि आम्याङ बिजि । थे तामसे पेम्बाला आपा आमादा सुर्ता ताजि ।

पेम्बाला आपा आमासे पेम्बादा माङग्यार क्लाङ्बारि आपुइनि । पेम्बा मङग्यार आनिगाइ बिसि दिमरि वाइफाइ थुइजि । पेम्बादा कार्टुन च्यासि चिउ बिजि । पेम्बा कार्टुन च्याबरि याप्जि । थे लोप्खाङ ग्याम्से हाबाहिन्दे आम्हेर्ते दोना कार्टुन च्यासि चिजि । कार्टुन च्याना च्याना पेम्बाला मिला ङ्हयाल्बो  वालावाला तजि । थेसे लामा पेम्बाला आपा आमादा देप्पेन सुर्ता ताजि ।

पेम्बाला आपा आमाचासे गोर्गि नागि ग्लुसि बाजि । थे नागिला मिन रक्कि थान्जि । पेम्बादा रक्कितेन छ्याम क्लाङ्गो बिजि । पेम्बा रक्कितेन छ्याम क्लाङ्बरि माइजि । थेसे रक्किदा ह्रो म्हान्जि । लोप्खाङ ग्याम्से हाबाहिन्दे आम्हेर्दे दोना रक्कितेन छ्याम क्लाङ्जि । थेसे रक्किदा स्ह्योरि रेबातेन गुड मर्निङ बिजि । लोप्खाङरि निलामाइ बाइबाइ लाजि । ङ्यासे म्हेर्गे लामाइ गुडनाइट बिजि । च्याना च्याना पेम्बाला ङामला ह्रो रक्कि दोजि ।

पेम्बा छार्सि हाजि । थे तिक्युङमारि बिमा जाक्कि नोजि । तिक्युङ्मारि आख्युप्पा म्रापला चुकुल ख्युप्पारि चुजि । कौसीला क्वान साङ्बा छो ख्युप्पारि म्हाइजि । थेदा क्योङ्सेन ङ्हाज्याङ ताजि बिजि । नोर्बुसे थेला रक्किचा ङ्हाज्याङ आताबा बिसि सुर्ता लाजि ।

नोर्बुला लोप्खाङ ङामथामा ङ्हाज्याङ चे मुबा । ल्होछार बिमा लागि लिच्छा थे चेरि फुटबल गेम ताजि । पेम्बा थेला रक्कि थोसि गेम च्याबारि निजि । ग्यालामरि रक्किसे सिजिबा गोर्गि नाम्युङ क्लोक चाजि । ह्रेच्छागि लिच्छा रक्कि काइँकाइँ बिसि ङ्ह्याबारि चुजि । पेम्बासे रक्कि दिमरिक्यार बोर्सि छ्योङ्खाजि । दिमरि दोगाबाइतेन रक्कि फोतोकफोतोक बोल्सि प्रेक सिजि । पेम्बा रक्किदा हापख्वाइसि क्राजि । सिसि जिन्बा रक्किदा ब्याङ्बारिन आपिन्नि । पेम्बा म्हेर्सि लिच्छा जेक्खेन रक्कि ब्याङ्जि ।

पेम्बा छोर्बा हेन्दे रक्कि म्हाइसि क्राजि । क्राना क्राना पेम्बादा छावा हाजि । थेदा मानखाङरि बोर्जि । थेरि पेडियट्रिक्ससे ल्हानान ताम पाङ्सि व्हाम्बा हेन्दे पेम्बाला छावा फान्जि ।