सरकारसे दाते– मुतेबा नेपाली लोप्खेनकादेसे ह्राङ्ला पेशागत हकहित थेन अग्रगामी शैक्षिक पोबाला लागि लाबा आन्दोलनदा योनान ग्युइसेर पेठिम जारी लाबारिक्यार आवाङ्ना फलानोसे थिजि ठिलानासे थिजि बिसि पाङ्चिबा मुला । लोप्खेनकादेला रचनात्मक आन्दोलनदा बदनाम लाचिबा मुला । लोप्खेनकादेफिरि आतोबा पालेकादे ल्हागाब लाचिबा मुला । ङ्हाच्छाला सरकार थेन ल्होलो पार्टीकादेदा पाले उन्चिबा मुला । राज्यले ग्युइसेरला न्होर दायित्व पुइआखाम बिसि ग्याप्से ल्हेबारि म्हाइचिबा मुला । चुह्राङ्लासि बुमजा सडकरि थोन्बा लोप्खेनकादे खाजिबाइ दल बिशेषला जेक्खे म्राङ्बा ह्राङ्बा तामकादे सरकारला ग्युइसेरफिला गैरजिम्मेवारपनला प्रस्तुती थेन शैक्षिक आन्दोलनदा राजनीतिकरण लासि लिपखाप्ना लाबारि म्हाइबा बिमा स्यान्दो तिगाइ म्राङ्बा आरे ।

गणतन्त्र नेपालला दुइ तिहाइ शाक्तिशाली हिन्ना बिबा दम्भ उन्बारि खाम्बा सरकारला नेतृत्वसे शैक्षिक आन्दोलनफिरि उन्बा चुह्राङ्बा व्यवहार आउदिन पेबा, नाइबा, असक्षम थेन अपमानजक बिमा स्यान्दो तिगाइ आहिन ।

एला बाङ्ला दम्भ ग्युइसेररि उथल पुथल बाबा ग्युइसेर पेठिम बासि उन्गो ले जामागा स्याबास याङ्ला । लोप्खेन नामदा सर्वोकृष्ट थेन डेन नामला लिरि विकास लासि उत्कृष्ट व्यक्तिजुगुला दाम्बारि ताना लाबा स्होखाम्गो ले ।

ह्रिसि चाबा, लुसि चाबा थेन पाङ्सि चाबा आहिन लासि लाबा ह्युलबाङ स्होबा ग्युइसेर पेठिम जारी लाउ । ग्युइसेर मोक्कोनदा गिक्खेन तोसोला लागू लाउ, क्योङ लिरि निशुल्क लासि उन्गो, फिरग्याप ह्युलरि ग्युर्बा ह्युलबाङ आहिन नेपालरि चिखाम्बा ह्युलबाङ उत्पादन लाउ, अंग्रेजी ग्योइदा प्राथमिकता आहिन नेपाली ग्योइ थेन आमाग्योइदा प्राथमिकतारि थान्सि ह्राङ्लापनला बोध लाबा ग्युइसेर लागू लासि उन्गो– सरकार !

दारे एला बोक्टो भाषण थेन उखान टुक्काकादे डुङ्गो । ओसेगा ङान्छे बिसेला मुला वा ! शक्तिशाली सरकार । ज्याबा सरकार । ह्युल्बाला सरकार । ग्युइसेर चेमो सरकार ।

(छिगला अर्थः लोप्खेन– शिक्षक, पेशागत– नामला, ग्युइसेर– शिक्षा, पेठिम– ऐन, न्होर– आर्थिक, बुमजा– लाखौं, नाम– पेशा, ह्युलबाङ– जनशक्ती, चोमो– प्रेमी)

दोःबा : यकिना अगाध