‘मेरी वुल्सटनक्राफ्ट’ थेसे ‘रुसो’दा चुनाउती पिन्बा मुबा । 
सन् १७९१ रि थोमस पेनसे महत्वपूर्ण दस्तावेज ‘Rights of Man’ ब्रिबा मुबा । तासाइ च्याङ्ना म्हिजुगुदा जेक्खे थाहा मुला कि थेला दिङ गि लिच्छा स्यान्दो याखारगि आउदिन महत्वपूर्ण दस्तावेज खाजि ‘Vindication of the Rights of Woman’ थे मेरी बुल्सटनक्राप्टसे ब्रिबा मुबा ।

दोङरापरि खाइमाखाइमा महान ह्रेम्कोलाकादेसे जामेकोलाफिरि तिगाइ ख्योल्बा तामकादे थान्बा मुला व्हा कुटिसि चिबा मुला थेला प्रतिकार जामेकोलाकादेसे थेदुइरिन लाबा मुला । फेबा चोदे जेक्खे मुला लिच्छा चुह्राङ्बा जामेकोलाकादेदा दोङरापला दोप गुरि आङ्बा मुला । ‘मेरी वुल्सटनक्राफ्ट’ चुह्राङ्बान याखारगि जामेकोला मुबा । डानस्ह्युगो, महान बैज्ञानिक डार्बिनसे बिबा मुबा कि जामेकोलाकादेला दिमाग ह्रेमकोलाकादेला बिमा जाजा ताला, थेदुइरि ‘एलिट बर्ट ग्याम्बल’ (Eliza Burt Gamble १८४१–१९२०)से चुला प्रतिवाल लाबान १८९४ रि ‘The Evolution of Woman: An Inquiry into the Dogma of Her Inferiority to Man’ मिनला छ्योइ ब्रिजि ओम प्रमाण थेन बैज्ञानिक तर्कला छ्याम डार्बिनदा ख्योल्बा साबित लाजि । अर्थात्, जामेकोलाकादे खाजिबाइ हिसाबसे ह्रेमकोला बिमा दिरि आरे ।

ठीक थेनोन ज्योरि, महान दार्शनिक रुसोसे ग्युइसेर सम्बन्धी ह्राङ्ला सेमतेन थान्बान जामेकोलाकादेदा फेबा तोसोला ग्युइसेर पिन्तोबा थेन थेन्से बिजाबुमोला न्हाबाछार्ना लाबाला लागि तयार तातोबा बिसि ब्रिजि, थेदुइरि मेरि वुल्सटनक्राफ्टसे च्योच्यो ग्युइसेरला वकालत लाबाकेन रुसोदा चुनाउती पिन्बा मुबा । मेरी वुल्सटनक्राफ्टसे ब्रिजि– खाजिबा नुर ह्रेमकोलासे डोबारि खाम्ला, थे जामेकोलासे नोन डोबारि खाम्ला । ह्रेमकोला थेन जामेकोलाला गुङरि तिगाइ ल्हुइला बनावटला फेबा बिमा स्यान्दो खाजिबाइ ग्रेन फेबा आरे ।

तिनि नोन समाजरि चु ताम सहज लिरि स्वीकार आला बिसाम ओन्मा २५० दिङ ङ्हाच्छा चुह्राङ्बा ताम कादे क्रान्तिकारी ताबा मुबा, कल्पना लाबारि खाम्ला ।

एडमन्ड बर्कसे फ्रान्सेली क्रान्तिरि (१७८९) आक्रमण लासिकेन ह्राङ्ला ब्रितामजुगु ब्रिजि, मेरी वुल्सटनक्राफ्टसे बहादुरीला छ्याम फ्रान्सेली क्रान्तिला पक्षरि राप्जि ओम ह्राङ्ला ब्रिताम ग्याम एडमन्ड बर्कला तर्कजुगुदा ध्वस्त लापिन्जि ।

चुबिमा महत्वपूर्ण ताम तिगा हिन्ना बिसाम, थेसे फ्रान्सेली क्रान्तिला अन्ध समर्थन आलाना चुला कमजोरीकादे नोन उजागार लाजि । थेसे चेतावनी पिन्जि कि क्रान्तिग्याम मुख्य लिरि ह्रेमकोलाकादेसे फाइदा किन्चिबा मुला ओम जामेकोलाकादे दोसि नोन वन्चित ताचिबा मुला ।

ह्याङ्से दोङरापला दोप गुरि चिमथान्बा चुह्राङ्बा महान जामेकोलाकादेदा दोसि दोङरापला ह्यालरि बाबारि आवश्यक मुला, चुह्राङ लासाम जेक्खे ह्याङ याखारगि सभ्य समाज स्हेङ्बारिक्यार ङ्हाच्छा वाङ्खाम्ला । 
(छिगला अर्थः ज्यो– शैली, ग्युइसेर– शिक्षा, सेमतेन– विचार, नुर– विषय)

दोःबा : यकिना अगाध