बुद्ध केबा ह्युलरि चिसि हिन्दु राज्य ह्रिला । खालाइला हिम्मत मुला– बुद्ध राष्ट्र ह्रिबारि ? ओम बुद्ध भारतरि केबा हिन्ना बिमा तिल्दा बुद्ध ह्याङ्ला हिन्ना बिसि बित्ता सोम फिर्बा काइतेजुगु ?

खाम्ला बिसाम बुद्ध केबा नेपालरि बुद्ध राष्ट्र ह्रिगो । बुद्ध कोन्ज्योसोमला मिनरि ह्रिसि चाबा ग्यालाम जेक्खे तिल्दा स्होला काइतेजुगु !

तिनि खालाइ तामाङजा ग्ले तोला बिसि ब्राचिबा मुला । ओइ ग्ले ह्रिबा तामाङजुगु ! एन्ना घेवा पण्डितसे लाला कि लामासे ?

ग्लेसे न्हुपला डलरला नाइके थोबा कारणजा तिगा मुबा चिम ? खालाइसे गोबारि म्हाइबा मुला ?

ओम सेमतेन लाउ ग्ले तोजि बिसि फिर्बा दातेला दिङ २०–२५ ला छारिब्योनजुगु हिन्ना । एन्दा तिगा थाहा ग्लेला दुइ खाराङ्बा मुबा बिसिमाम । दाते ग्लेला शासन खाजि बिसाम गणतन्त्ररि ह्राङ शासनला लिब्रो लाबारि आम्याङ । गणतन्त्ररि शासक सेम आनिनि बिसाम केबारि म्याङ्ला । चुनाबरि ब्रेना लाबारि म्याङ्ला । ग्लेला शासन खाजि बिसाम न्हा ग्लेदा चुनाबरि ब्रेना लासि ब्याङ्बारि म्याङ्ला न्हा केम्याङ्ला ।

दाते ह्युलला छे ल्हेजि बिबा एन्छे छोर्बा मुसिम । थे दुइला छे च्याङ्बान ताला ले । नाम्सा नाम्सारि ग्यालाम दोबा आरेमुबा । विकास ताबा आरेमुबा । जाजाकार खाबा बजेट नोन ग्लेला आसेपासेसे चामुबा । प्राङ्बोला जा जामेदा थे ग्लेला आसेपासेसे ग्याप्पा स्होमुबा । तामाङजुगुदाम मासिन्या बिसि पशु च्योच्यो स्होथान्मुबा ।

दाते नोन ङाइ डान्चिमुला– ५ लिटर मट्टितेल किन्बारि १२ घन्टा लाइन चितोमुबा ग्लेला शासन दुइरि । ङाला म्हेमे आखेला दुइरिम झान खाराङ्बा मुसिम ? अनुमान नोन लाआखाम ।

दातेला शासन जेक्खे म्राङ्बा दिङ १५–२० ला छारिब्योनजुगु ‘ग्ले खाउ, ह्युल सोना लाउ रो !’ ताम लाला अर्थ न्हा व्यर्थला ।

गणतन्त्रला विकल्प ग्लेला शासन आहिन । बरु, भ्रष्टचारी शासकजुगुदा ह्याङ्से चुनाव ग्याम ब्याङ्तोला ।

चुनाव खामाजा गिलास नाङ आइराक थेन प्लेट गि स्यारि ग्युर्सि भोट चुङ्बा ओसेम चुनाव लिच्छा क्रिङ्सि, पाले पिन्सि खाइमाइ व्यवस्था पोला ओम ?

ह्याङ्से ह्राङ्ला ह्रिक्पा सुधार लाबा दुइ खाजि । दारे सुधार लाइ ।

(ब्रिखेन नेपाल तामाङ घेदुङ, इजरायलला ङ्हाच्छाला चोहो हिन्ना ।)

(छिगला अर्थः सेमतेन– विचार, लिब्रो– विरोध, केबा– गाली, छे– ऋण, ग्याप्पा– दासी, छारिब्योन– युवा, ह्रिक्पा– चरित्र, ।)  

दोःबा : यकिना अगाध