उखान मुला– म्हाङ आम्राङबा म्हि थेन मुर्दा गिनोन हिन्ना । राज्यसे लेसि फेसि दुल्मा सुताइ ह्याङला आखे म्हेमेसे न्हाङगरला पुस्ताला लागि बिसि ह्राङला ग्योइ, रिम ठिम खाइमा आख्लाना सोना लासि थान्जि । पुस्ता दरपुस्ता हस्तान्तरन लासिन निजि । दाते ह्याङ ङा तामाङ हिन्ना बिसि जुन पहिचानरि ङोसेबा मुला म्हेमे आखेलान देन हिन्ना चु । चु तामदा सेसि आसेसि नितिदोना नाम्सा नाम्सारि ठाम्चिबान मुला ।

पुख्रिसे स्योप पोमाह्राङ दुइ पोसिन निला । खालाइ लिच्छा ताजि वा ङ्हाच्छा थेदा मतलब आता । दुइ अन्सार ब्रआखाम्बाजुगु चु जाम्बुलिङरि डाइनोसर दोसि निसेलान मुला । चु ताम ह्याङ डोबा ब्रिबाजुगुदाजे आहिन ह्याङला म्हेमे आखेदा नोन थाहा मुबा । थेतासि तिनि दोना ह्राङला ग्योइ, रिमठिम छार्ना सार्ना लासि ह्राङदा डाइनोसर दोआपुङनि । तिनि ह्याङ बिसाम म्हेमे आखेसे उन्थान्बा ग्यामग्याम ख्योल्सिकेन निबा ह्राङ म्राङचिमुला । तामाङ डाजाङ गेन्दुन स्हेङबाला उद्देस्यमध्येरि गिक हिन्ना– पुरानोदा सम्मान, छारतेन सहकार्य । चु उद्देस्यअन्तरगत डाजाङसे तिबा दुइरि एल्बम दिबस, सञ्चार दिबस दाङमुबा । तामाङजुगुला गिक्खे साझा गेन्दुन नेपाल तामाङ घेदुङसे सामान्य म्हान्बा चु गेजुगु डाजाङसे बिसाम अद्भुतपुर्न म्हान्मुबा । तिल्दा बिसाम तामाङ पहिचानला प्रमुख अङग ग्योइदा ह्वाइग्याम्से तागाइकि छिकग्याम तागाइ सोना लाबा गेला सुरुवात तामुबा थेकुनु । दाते डाजाङसे चु दिबस ङ्हि आदाङमुला । चुला कारन मुला ।

ङ्हाच्छारि डाजाङ स्हेङबा दुइरि तामाङ सञ्चर समुह आस्हेङचिमुबा । दाते चु गेन्दुन स्हेङजिन्जि । थेसे ह्राङला स्थापना दिबस दाङबा लामुला । चु ज्याबा थेन प्रसंसानिय गे हिन्ना । थे ताबासे डाजाङ गेन्दुनसे चु दिबस दाङबारि ख्लाजि । सम्बन्धित गेन्दुनला बोरि दोजि । ओस्बान लासि नेपाल तामाङ कलाकार संघ नोन स्हेङजिन्मुला । चु गेन्दुनसे बिसाम ह्राङला पहिचान म्हाइबा गे लाबा आम्राङनि । सायद चु दुखला ताम हिन्नोला । डाजाङ गेन्दुनसे सम्बन्धित गेन्दुनसे स्थापना दिबस आदाङबासे दातेदोना फागुन १५ गते दातेनोन एल्बम दिबस दाङबाकेन मुला । ग्रेन तामझामरि आताना  ह्वाइ संगितला थुमरि बौद्धिक बहस थेन काठुइ लासि । स्यान्दो गेन्दुनदा चु ताम पाङबाकेन लामा डाजाङ गेन्दुनदा नोन फेसि थान्बारि बिसाम आखाम । तिल्दा बिसाम चु गेन्दुनसे नोन ह्राङला स्थापना दिबस तिनि दोना दाङबा आरे । थे ताबासे योनान चु तामफिरि काठुइ लातोला म्हान्मुला । तामाङ ब्रिखेन दिबस ग्योइकाइ गेताङदा आधार किन्सि स्हेङमा ज्याबा ताला कि छ्योइ थोन्बा दुइदा आधार स्होसि स्हेङमा ज्याबा ताला बिबा तामफिरि योनान ह्याङसे काठुइ लातोला म्हान्मुला । चुबारेरि सम्बन्धित नेतृत्वकर्ताजुगुला ध्यान दोतोबा म्राङमुला ।    

(तामाङ डाजाङ स्योस्योला १४३ बोला बेने २०७४ दिङला डिक्खेनताम ।)