प्रजातन्त्र दिवस तेन्बाला सार्थकता खाइ तिला ? प्रजातन्त्र दिवस तेन्बारि ह्युल थेन ह्युलबासे म्हान्बा ह्राङ्बा प्रजातन्त्र खबा अरे । प्रजातन्त्ररि ह्युलबाला शासन तला । प्रजातन्त्ररि गेनामजुगुला शासन ताला । तासाइ बिडम्वना ह्याङ्ला ह्युलरि पुँजीपतीकादेला शासन मुला । भ्रष्टाचारीकादेला शासन मुला । फिरग्याप ह्युल्ला दलालकादेला शासन मुला । घुसखोरीकादेला शासन मुला । गुण्डागर्दी लाबाजुगुला शासन मुला  । हिन्ना, थेनिकादेला जेक्खे हिन्ना चु प्रजातन्त्र । ह्युलबाल प्रजतन्त्र आहिन । थेराङ्तासि खाइमादोना गेनाम वर्गसे मुक्ति आयाङ थेदुइ दोना प्रजातन्त्र दिवस तेन्बाला तिलाइ सार्थकता आरे । 

शासककादेसे बेने (फागुन) ७ रे कुनु प्रजातन्त्र दिवस तेन्बा लामा बुमसे बुम ह्युल्बा, छारिब्योनकादे फिरग्याप ह्युल ग्याम ह्राङ्ला ह्युल थेन दिमनाम, दिमम्हे डान्वान गेदोइ लातोबा बाध्याता मुला । कादे ह्युलबाजुगुसे अनाहाकरि म्हिला ह्युलरि ल्हुइ व्याङ्तोबा बध्याता ताटिबा साङग्युरकादेनोन थेदोबा मुला । दोसि लिच्छा खिम्सा ह्युल भारतरि डोबारि निबा लोप्बोनसे ल्हुइ व्याङ्बाला कारण थेनोन विश्वविद्यलयला प्रशासनसे लोप्बोनजुगुदा लाबा दुरव्यवहारसे हिन्ना बिबा साङग्युर खाजिमुला । तिला चुह्राङ्बा चुह्राड्बा दुर्गातिकादे म्राङ्बा व्हा थेबारि २००७ दिङल क्रान्तिसे १०४ दिङ ताबा निरंकुश जहानीय राणा शासनला ठिम थुम्ना लाबा हिन्ना ? पाक्कान आहिन, थे प्रजातन्त्रसे ह्युलबाला मुतेबा हक थेन याङ्तामला सुनिश्चितता लातोबा हिन्ना । 

च्योच्यो सोम्याङ्बा याङ्ताम तादोबा हिन्ना । तासाइ थे ह्युलबाला मुतेबा याङ्तामकादे कुण्ठित लासि शासककादे डेबा ताङ्बा लाचिबा मुला । खाला सरकारला कुर्सीरि दोजि थेदा प्रजातन्त्र खाजि । जबकि, युद्धग्रस्त ह्युलकादेरि नेपाली ह्युलबाकादे गोजाला धाररि गे लाबारि बध्या मुला । कादे म्हेमि युद्धरि पारापतासि ल्हुइनोन निजिबा मुला विसाम विपिन जोशी ह्राङ्बा छारिव्योनकादेसे ह्राङ्ला ल्हुइदा ह्रावा लाबारि स्हिवा (क्षमायाचना) लाबान मुला । तासाइ शासककादे बिसाम ह्युलरिन गे दोइला बन्दोबस्ता लाबाला बोरि फिरग्याप ह्युलरि श्रम सम्झौता लाबान मुला । ओम, ग्युइसेर थेन ल्हुइथाङरि छोङ लाटिबा मुला । 

चु बिबा याखारगि, गोजाला धाररि ह्युलबाला ल्हुइ थान्सि प्रजातन्त्र रो ! चुह्रङ्बा दुइरि प्रजातन्त्र खाजि बिबारि आडिग । देन्बा प्रजातन्त्रला ग्याम ब्राबारि ग्युइसेर, ल्हुइथाङ थेन गेनामला बन्दोबस्ता राज्यसे लातोबा हिन्ना । ह्युलबाकादेदा याङ्ताम ग्याम थारेङ थान्ना आदेवा हिन्ना । तासाइ ओथेन लाआखाम्बासे क्यार नेमकिपाला सेम आन्सार भक्तपुर नगरपालिकासे ह्युलबाला प्रजातन्त्र हिन्से माक्र्सवाद, लेनिनवाद थेन माओत्सेतुङ बिचारधारदा किन्सि ह्युलबादा होराङ्नोन लोप्खाङ, होराङ्नोन मानखाङ तादोला ओम ह्युलबादा गेदोइला बन्दोबस्ता तादोला पाङ्सि ह्युलबाला बिजामुबोकादेदा सस्तोरि ग्युइसेर पिन्दोला म्हान्सि ख्वप विश्वविद्यलायला अनुमति सरकारदा ह्रिमा दान्दोना पिन्बा आरे । 

चोदे सस्तो थेन गुणस्तरीय ग्युइसेर किन्बाला लागि ख्वप विश्वविद्यलायला अनुमति सरकारसे पिन्साम फिरग्याप ह्युलरि उच्चा ग्युइसेरला लागिरि निअतोसेला । ह्याङ्लन ह्युलरि गोल्छेगोल्छे गेनामला ग्याम ठोड्सेला । तासाइ सराकरला कुर्सीरि टिबा शासककादेला आज्याबा सेम लाबाला कारण ह्युललान ह्युलबासे स्हु याङ्चिबान मुला । चुराङ्बा दुइरि शासककादेसे बेने ७ रि प्रजातन्त्र दिवस तेन्बाला तिला सार्थकता मुला ओम खाइ ? 

काँक्राबारी, भक्तपुर ।