केवारि सफलता खालाइसे देबाः लासि आयाङ । आख्लाना मिहिनेत, संघर्ष थेन धैर्यला रोलिसे जेक्खे म्हिसे उचाइ थुर्ला ।
तासाइ ह्याङ्ला समाजरि याखारि अजीबला प्रवृत्ति म्राङ्ला– खाइमा खालाइला संघर्ष चलप ताचिबा ताला, खालाइसे वास्ता आला, ह्रो आपिन । बरु, तामथासि कुटिसि चिला ।
ओम खाइमा थे सफल ताला, थेदुइरि थेला सफलतादा स्वीकार लाबारि आखाम, लिसो ख्योल्बा म्हाइबारि चुला ।
‘चुमि थोप्साङ थोप्बा म्हि चिम ।’
‘पाक्कान खालाइला सिफारिसरि ङ्हाच्छा दोजि ।’
‘चोथेबा ग्रेन ताम लाजि, तासाइ नोन चुजा ज्याबा आतानि ।’
चुह्राङ्बान छिगजुगुसे ह्याङ्ला समाजला ल्हानान मिहेनती म्हिजुगु निरुत्साहित ताबा मुला ।
तिल्दा ह्याङ स्यान्दोला सफलता म्राङ्मा क्रोला ।
तिल्दा प्रशंसा लाबारि आखाम ?
तिल्दा प्रेरणा किन्बारि आखाम ?
स्यान्दोदा उन्सि आहिन, ह्राङ्सेन तिगाइ लासि उन्गो । केवा लिब्रो जेक्खे लासि थाबा आहिन । स्यान्दोला कमजोरी म्हाइबा जेक्खे आहिन, ह्राङ्ला ग्यालम स्होउ । चोदे स्यान्दोसे ख्योल्बा लाबा मुला बिसाम थेन्दा सच्याप लाबारि खाम्ला । तासाइ सातान आज्याबा (नकरात्मक) दृष्टिकोण थान्सेला हिन्ना बिसाम केवानाङ स्यान्दोला आलोचना लासि जेक्खे चिबा म्हि ह्राङ खानाङए आदो ।
स्यान्दोला प्रगति म्राङ्सि क्रोसि चिबा बिमा ह्राङ्सेन तिगाइ लासि उन्बा प्रयास लाइ । स्यान्दोला सफलतादा डेन लाइ, प्रेरणा किन्गे ओम ह्राङ्ला दोखाङरिक्यार ङ्हाच्छा वाङ्गे ।
सफलतासे जेक्खे श्रम थेन लगनशीलतादा तेन्सि पुरस्कार पिन्ना, लिब्रो लाबादा आहिन । समाजदा पोइ । समाज बिबा ह्याङ्से स्होबा समुह हिन्ना ।
चोदे ह्याङ्सेन गिसेम गिदा ङ्हाच्छा वाङ्बारि बाङ लाखाम बिसाइ नोन स्यान्दोला ज्याबा म्राङ्मा ‘ज्याबा ताजिम’ बिबा आँट लाइ । खाल्से ज्याबा लाला, थेदा प्रोत्साहन पिन्गे ।
तिल्दाबिसाम स्यान्दोला ह्युल सेसि ह्राङ्ला नाङ्साल आलुङ । ह्राङ्ला ग्यालाम ह्राङ्सेन स्हाेतोला ।
(छिगला अर्थः केवा– जीन्दग÷जीवन, देबाः– सजिलो, रोलि– फलस्वरुप, लिसो– उल्टो, ख्योल्बा– गल्ती, थोप्साङ– भाग्य, लिब्रो– बिरोध, दोखाङ– लक्ष्य, तेन्सि– मानेर, ।)
दोःबा : यकिना अगाध
तपाईको प्रतिक्रिया दिनुहोस