तिनि न्हाङ्गार माक्र्सवाद खेबा (पुरानो) बिसि प्रचार लाबाकेन मुला । पेरिस कम्युनला विघटन लिच्छा पुँजीपति वर्गसे दारेम गेनाम (मजदुर) आन्दोलन हाइमान रेआहाम्सेला दाबी लाबा मुबा । तासाइ अक्टोबर क्रान्तिसे गेनाम आन्दोलन गेनाम ह्युल्बाला सत्ता याङ्तेदोना रेसेला म्राङ्जि । माक्र्सवाद पुँजीवादला उत्थान, विकास थेन पतनला नियम हिन्ना । माक्र्सला ह्रो एङ्गेल्ससे माक्र्सला समाधिरि पाङ्स्ह्युजि– ‘डार्विनसे जीव विकासला सिद्धान्त पत्ता ल्हागाब लाबाह्राङ लासि माक्र्ससे म्हिला ह्युल पोबाला ठिम (नियम) पत्ता ल्हागाब लास्ह्युजि । थेराङ्तासि जाम्बुलिङरि माक्र्सवाद हाइमाइ खेबा तासेला आरे ।

सन १९१७,२५ अक्टोबरला रे (स्यानह्युल चि आन्सार ७ नोभेम्बरला रे ) बोल्शेभिक पार्टीला सुङ्स्यो (मुखपत्र) ‘रावोची पूट’ (मजदुरकादेला ग्यालम ) रि ग्रेनग्रेन हिगिसे ब्रिबाला मुबा– मुतेबा हुकुम गेनामकादे, सिपाहीकादे थेन किसानकादेला यारि ! शान्ति ! गेङ ! सा ! लेनिनला नेतृत्वरि ताबा बोल्शेभिक पार्टीला चिसाङसे १६ अक्टोबरला रेरितेन स्तालिनला नेतृत्वरि लिब्रो सञ्चालन लाबरि गि पार्टी केन्द्र दाम्बा मुबा । ल्हानान ह्युल्बा लिब्रोला पक्षरि मुबा । पार्टीला तर्फग्याम्से लेनिनसे दिला समितिकादेता लिब्रो लासि छेबारि कुलस्ह्युजि । अस्थायी पुँजीवादी सरकारला काइब्लोन (प्रधानमन्त्री) करेन्सकीला नेतृत्वरि मुबा लोन्बोकादे ङ्हाच्छान जारला दरबार शीतल दरबाररि चिसाङ चिबाकेन मुबा । क्रान्तिकारीकादेसे शीतल दरबारता ग्लासोमग्याम्से रिलख्वाइजि । अस्थायी सरकारला लोन्बोकादे चुङ्जि । राष्ट्र बैंक, आकाशवाणी, टेलिफोन, सेनाला सदरमुकाम कब्जा ताजि । काइब्लोन करेन्स्की गोर्गि म्रिङ्कोलाला गोइलोरि ह्यार्जि । चुराङ्लासि अक्टोबर क्रान्तिसे रुसला नमथोरि गेनाम ह्युल्बाला दाज्र्यु (झण्डा) क्याजि । सोभियत सरकार ह्सेङ्जि । लेनिनसे क्रान्तिला न्हाङ्गर ताङ्सेतेन क्षतिपूर्ति आपिन्ना साथोरि जमिनदारकादेला स्वामित्व थेन पुँजीपति वर्गला निजी स्वामित्व जिन्ना लास्ह्युजि । लेनिनसे मुतेबा ह्युल्बाला बौद्धिक विकाससे स्वीकार आतिदे दोना समाजवाद आबासेला हिन्साम ५ सय दिङ दोनान समाजवाद आहासेला, साधारण ह्युल्बा अशिक्षित बिसि गेनाम वर्गला अग्रदूत समाजवादी ग्लेठिम (बोल्शेभिक) पार्टीसे क्रान्तिता काबारि आतासेला, पुँजीपति वर्गचा तिक्काइ सम्झौता आतासेला थेन थेनिकादेला बाङ (शक्ति)दा जिन्ना लाबरि जोड पिन्स्ह्युजि । 

अक्टोबर क्रान्तिदा काबारि पुँजीपति वर्गसे १९१७ फेब्रुअरी २७ रि राजतन्त्रदा जिन्ना लासि चुनाव आतादे दोनारि करेन्स्कीला नेतृत्वरि अस्थायी पुँजीवादी सरकार ह्सेङ्बा मुबा । थे सरकाररि मेन्शेभिककादेसे बोकिन्जि । मेन्शेभिककादेसे सरकाररि निसि नातावाद, पक्षपात, भ्रष्टाचार लाजि । तासाइ लेनिन नेतृत्वला बोल्शेभिक पार्टी समाजवादी क्रान्तिरिन समर्पित ताबासे अक्टोबर क्रान्ति सम्भव ताजि । 

म्हि स्वभावसेन स्वतन्त्रता म्हाइमुला, थे स्वाधीन ताबारि म्हाइमुला । म्हिसेमि हालाइला ग्याप्पा (दासता) स्वीकार आतिमुला । अन्याय थेन अत्याचारला लिब्रोरि छेबा चेतना म्हिरि जेक्खेन मुला । म्हि विवेकशील प्राणी हिन्ना । सृष्टिरीतेन क्योङबिमा उत्कृष्ट प्राणीला लिरि म्हिदा किन्मुला । चुनोन प्राकृतिक  स्वभावला कारण जाम्बुलिङरि ल्हानान क्रान्तिकादे ताजि ।            

अक्टोबर क्रान्ति जाम्बुलिङ्ला समाजवादी क्रान्तिला गोर्कि कोसेयुङ्बा हिन्ना । जाम्बुलिङरिन गिक्छा रेम गेनाम वर्गला व्यवस्थित, सङ्गठित, क्रान्ति ग्याम्से गेनाम वर्गला छार ह्युलठिम ह्सेङ्सि चलाइदिबा मुबा । गेनाम वर्ग शोषण ग्याम्से मुक्त ताबा मुबा । शोषणला छोदाकादे टाङ्बा मुबा । अक्टोबर क्रान्ति बिमा ङ्हाच्छा ल्हानान क्रान्तिकादे आताबा आहिन । दास विद्रोहकादे ताजि, सामन्तवाद लिब्रो पुँजीपति वर्गसे क्रान्ति लाजि । तासाइ थे क्रान्तिरि गोर्कि तोसेला शोषणला नुप्ना (अन्त्य) लासि स्यान्दो तोसोला शोषण कायम तानिजि ।

ह्युलरि वर्गीय भेद कायम ताजि :

अक्टोबर क्रान्तिबिमा ४६ दिङ ङ्हाच्छा सन १८७१ रि फ्रान्सला पेरिसरि गेनाम ह्युल्बाकादेसे विद्रोह लाजि आन्हेम ह्राङ्लान सत्ता ह्सेङ्जि । तासाइ थे सत्ता जेक्खे ७१ दिन चल्दिजि । क्रान्ति असफल ताजि । प्रतिक्रियावादी वर्गसे क्रान्तिता गेनाम ह्युल्बादा कारी ब्लुमपिन्जि । तासाइ अक्टोबर क्रान्तिररि गेनाम वर्गसे व्यवस्थित, सचेत थेन संगठित तासि क्रान्ति लाजि । अक्टोबर क्रान्तिला ग्याप्से क्रान्तिकारी दर्शन मुबा, विचारधारा मुबा, गेताङ मुबा, युद्ध ठिम मुबा आन्हेम गोर्कि छार ह्युल ह्सेङ्सेदा योजना मुबा ।

चु ङामरि ल्हानान महत्वपूर्ण ताम मुला, पेरिस कम्युन असफल तासाइनोन चुसे माक्र्सवाद सही मुला बिबा प्रमाणित लाजि । पेरिस कम्युनसे गेनाम वर्गता गोर्कि ग्युइसेर नोन पिन्जि कि पुँजीपति वर्गसे ह्सेङ्बा राज्यरि संयन्त्र कब्जा लाबाबिमा थे खेबा संरचनाता जिन्ना लासि छार संरचना ह्सेङ्बारि आवश्यक मुला । चु सिद्धान्तता चिनियाँ क्रान्तिला नेता माओत्सेतुङसे चुङ्स्ह्युजि । माओत्सेतुङसे सुङ्स्ह्युजि– ‘ह्याङ खेबा जमम्बुलिङ्दा जिन्ना लाबरि जेक्खेन आहिन छार जाम्बुलिङ ह्सेङ्बारि नोन ओत्तेन सिपालु मुला । पुख्रि सिसाइनोन मे ह्योङ्सिन चिला बिबाह्राङ नोन प्रतिक्रियावादी वर्गला अवशेष लेङ्बान ताजिला । छेन्हाङरि क्लाङ्चिबा पिङपुख्रि ह्राङ्बा शोषक वर्गता दुल्सि चिदोसेदा तामुला ।’ चिनियाँ ग्योइकाइब्रिखेन लु सुनसे सुङ्स्ह्युजि, ‘ग्योइरि ताइबा म्योबा नागीता आसेदेदोना थोबोरिदेन पुङ्सि चिदोमुला ।

अक्टोबर क्रान्तिला स्यान्दो महत्वपूर्ण पक्ष बिबा चुसे साम्राज्यवादीला लूट थेन दुल्बाला शिकार एसिया, अफ्रिका, ल्याटिन अमेरिकाला ह्युल्बाता मुक्तिला युद्ध लड्दिबारि उद्घोष लाजि । अक्टोबर क्रान्तिला तोपला काइसे जाम्बुलिङ नाङला गेनाम वर्गता छोर्ना लासि पिन्जि । माक्र्सवाद थेन लेनिनवादता जाम्बुलिङला गागुरि दोना लासि पिन्जि । दर्जनौं ह्युलरि गेनाम वर्गला पार्टीला संगठन ह्सेङ्थान्जि । जस्तो, चिनियाँ कम्युनिस्ट पार्टीला ह्सेङ्बा थेनोन ख्यारख्युररि ताजि । सन १९५०–५३ रि कोरियाली क्रान्ति ताजि, सन् १९४९ रि चिनियाँ क्रान्ति ताजि । थेराङनोन लासि क्युवा थेन भियतनामरि क्रान्ति सम्पन्न ताजि ।

अक्टोबर क्रान्तिला उपलब्धिला ताम लामा :

१, गृहयुद्ध जिन्बा दशकगि न्हाङरिन अशिक्षा क्योङ लिरि जिन्ना लाजि । 
२, दिङ ङिसला आधारभूत माध्यमिक ग्युइसेर क्योङ्तान अनिवार्य ह्सोपिन्जि । युरोपला स्यान्दो हाच्युबानोन ह्युल्से तात्कालीन दुइरि चु उपलब्धि किन्बाला आरेमुबा ।
३, जमिनदारी ठिम जिन्ना लाजि आन्हेम प्राङ्बो क्योङ गेनाम ह्युल्बाकादेता सामूहिक खेती थेन सहकारीकादेरि आबद्ध लाजि ।
४, क्रान्ति लगत्तै क्योङ नागरिककादेता निःशुल्क ल्हुइथाङ (स्वास्थ्य) सेवा उपलब्ध लाजि ।
५, क्योङ्तान गे स्हेङ्जि आन्हेम गेआरेबाकादेता क्योङ लिरि जिन्ना लाजि । सन् १९३६ दोनारि मुतेबा गेखाङकादे (रोजगार केन्द्रहरू) डुङ्जि । तिल्दा बिसाम क्योङ गे लाबाला अवस्था दोजिन्बा मुबा ।
६, छार सरकारला ङ्हाच्छाङ्ला निर्णयकादे गुङरि म्रिङ्कोलाकादेता च्योच्यो याङ्ताम, च्योच्यो ज्याला, मातृत्वला सुविधाला याङ्ताम थेन सम्बन्ध विच्छेद लाबा याङ्ताम नोन सुनिश्चित लाबा मुबा । क्रान्तिसे म्रिङ्कोला मताधिकार सन् १९२८ रि जेक्खेन पिन्बाला मुबा ।
७, ह्युल्बाता पिन्बा साँस्कृतिक स्रोतकादे ल्हानान ल्हेना लाजि । राज्य ह्राङ्से छ्योइ तेबा हेन्से सिनेमा, ह्रोल्ज्याङ (सङ्गीत) थेन (ग्युइल) कला थुमरि लगानी लाजि । 

अक्टोबर समाजवादी क्रान्तिसे ग्युइसे थेन ल्हुइथाङ थुमरि ल्हानान प्रगति लाजि । ग्युइसेर थेन ल्हुइथाङला जिम्मेवारी सरकारसे किन्बाला मुबा । न्होरआकिन्ना अनिवार्य ग्युइसेर लागू लाबा ङ्हाच्छाला ह्युल नोन सोभियत रूस मुबा । ग्युइसेरदा गेतेन छ्याम थुइबा ठिम सोभियत संघसेन स्होजि । समाजवादी ग्युइसेर डिछ्यासे ह्युल्ला उत्पादकत्व ल्हेना लाबारि महत्वपूर्ण भूमिका क्लाङ्जि । क्रान्तिसे मुतेबा नागरिककादेता सेबा जेक्खे आस्होनि (साक्षर मात्रै बनाएन) ह्युल्लान शैक्षिकस्तर हाच्युबान न्हुपला (पश्चिमा) ह्युलबिमा च्याङ्ना आरेबा जबकि क्रान्ति ङ्हाच्छा ३८ प्रतिशत ह्रेम्बोकोला आन्हेम १३ प्रतिशत म्रिङ्कोला जेक्खेन सेबागोबा मुबा । क्रान्ति लगत्तै अर्थात सन् १९२० हिन्दे १९४० ला सेबागोबा (साक्षर) अभियानसे ५ करोड सोभियत ह्युल्बाता सेबागोबा दोना लासि रेकर्ड थान्बा मुबा । १९६० दोनारि ह्युल्दा क्योङ सेबागोबा घोषणा लाबा क्रान्तिला सर्वाधिक महत्वपूर्ण पक्ष तेन्मुला । करोडौं सोभियत ह्युल्बासे जेक्खेन आहिन जाम्बुलिङला हजारौं ह्युल्बासे सोभियत संघरि निशुल्क खेप्पा शिक्षा हासिल लाजि ।

शिक्षाला विकास छ्यामछ्यामनोन ह्युल्ला उत्पादन बाङ ( शक्ति) ल्हेजि । समाजवादी रूससे विज्ञान थेन प्रविधिरि अभूतपूर्व उन्नति लाजि । २० औं शताब्दीरिन वैज्ञानिक आविष्कारला थुमरि सोभियत संघसे नेतृत्वदायी भूमिका क्लाङ्जि । विज्ञान थेन प्रविधि आविष्कारला २० हिन्दे २५ प्रतिशत बो (हिस्सा) सोभियत संघला बोरि हामुबा ।
सोभियत संघसेतेन सन् १९५७ रि जाम्बुलिङ्ला ङ्हाच्छा अन्तरिक्ष यान स्पुटनिक सफलताला छ्याम प्रक्षेपण लाबाला मुबा । अन्तरिक्षरि ङ्हाच्छा जीव लाइला मिनला नागिता पुइबा सफलता सोभियत संघसेसेन याङ्बा मुबा । चुमि उदाहरण जेक्खे हिन्ना । चुला अर्थ विज्ञान थेन प्रविधिरि समाजवादी रूससे तिलस्मी सफलता याङ्बा मुबा । पुँजीवादी ह्युल्से ग्यार्जा ङ्हि दिङ ल्हागाब लासि लाबा प्रगति सोभियत संघसे दशक ङ्हि सोमरिन लासि ओन्जि । तासाइ साम्राज्यवादी ह्युलकादेसे सोभियत संघला लिब्रोरि ल्होलो  आहिन्बा पाङ्सि चिजि ।

जनस्वास्थ्य थुमरि नोन समाजवादी रूससे जम्बुलिङता नमुना दोसि ओन्मुबा । क्योङ ह्युल्बाता निःशुल्क ल्हुइथाङ क्योन्बा (उपचार)ला डिछ्या लाबारि देबाः (सजिलो) गे आरेबा । क्रान्ति बिमा ङ्हाच्छा जार शासनरि ह्युल्बाला छ्योआछ्यो आयु ३२ जेक्खेन मुबा ।

अस्सीला दशकरि दोमा आयुदर छ्योआछ्यो ६९ दोजि आन्हेम चु आयुदर बिबा न्हुपरि स्यान्दो ह्युल्ला च्योच्यो मुबा । सन् २००४ रि पुटिन शासनरि आयुदर च्याङ्सि ६३ तानिबा चुरि उल्लेखनीय मुला । तिनिन्हाङगर न्होरआकिन्ना ल्हुइथाङ क्योन्बा डिछ्या ब्याङ्बा मुला । निजी अस्पतालला संख्या ल्हेबा मुला ।

अक्टोबर क्रान्तिला उपलब्धिला चर्चा लादोमा गेला थुमरि ताबा उपलब्धिता फेबारि आदा । मुतेबा युगरि व्यक्तिता स्थिर थेन स्थायी गेला डिछ्या मुबा । हाल्लाइदा नोन हप्तारि ४१ घण्टा बिमा ल्हाना गे लाबारि आपिन्मुबा । जोखिमपूर्ण थुमरि गे लाबा गेनामसे हप्तारि ३६ घण्टा जेक्खेन गे लासाम योमुबा । म्रिङ्कोला ५५ दिङरि आन्हेम ह्रेम्बोकोला ६० दिङरि सेवा निवृत्त तामुबा । जोखिमपूर्ण गे लाबा गुङ्ला म्रिङ्कोला ४५ दिङरि आन्हेम ह्रेम्बोकोला ५० दिङरि सेवा निवृत्त तामुबा । गेनाम ह्युल्बाला आराम थेन बिदाता सहुलियतला लिरि आकिन्ना याङ्तामला लिरि किन्मुबा । चुरङ्बा गेनाम ह्युल्बाला याङ्ताम बारेरि संविधानरिन ज्याना ब्रिबाला मुबा । पुँजीवादला दोसि पुनःस्थापना लिच्छा सोभियत संघ थिसि छार ह्युलकादे स्होमाहेन्से बेरोजगारी समस्या विकराल ताजि । युरोपेली संघसे गे आरेबाला संख्या ल्हेसि २ करोड ५० बुम (लाख) उन्बा मुला । चु तथ्यांक च्यामा गे आयाङ्बा पुँजीवादला नोइ (रोग) बिबा प्रष्ट म्राङ्जि । सोभियत संघ विघटनलिच्छा स्होबा छार ह्युलकादेरि तिनि गेनाम ह्युल्बाला ज्याला च्याङ्सि  निमुला । बिजाबुमो गेनाम ह्युल्बा (बालश्रमिक) कादेला दर ल्हेबाला मुला । 

नागरिकला लागिरि ङ्हाच्छा आरामदिम (आरामगृह) लेनिनला निर्देशनरि सन १९२० रि स्हेङ्बा मुबा । सन १९४० दोनारि चुराङ्बा आरामदिमला संख्या ३६ सय दोबाला मुबा बिसाम सन १९८० दोनारि १४ तोङ्जा दोबाला मुबा ।
म्रिङ्कोला याङ्तामला थुमरि नोन अक्टोबर क्रान्तिसे उदाहरणीय योगदान पिन्जि । वर्गीय, लैङ्गिकरि लेबाफेबाला मुबा म्रिङकोलासे ह्राङ्बाङ (स्वतन्त्र) ताबा याङ्ताम याङ्जि । क्रान्ति ङ्हाच्छा ८० प्रतिशत म्रिङकोला अदक्ष थेन अन्स्कील्ड मुबा । म्रिङकोलाला कमाइ ह्रेम्बोकोलाला बिमा गाङ्सल मुबा । ८७ प्रतिशत म्रिङकोलाकादे निरक्षर मुबा । क्रान्तिला गिक्छा घोषणाग्याम्से म्रिङकोलाता ग्लेठिम याङ्ताम पिन्बाला मुबा । 

बेलायत थेन फ्रान्सरि म्रिङकोलाता ग्लेठिम याङ्तामला डिछ्या सन् १९१८ रि आन्हेम संयुक्त राज्य अमेरिकारि सन् १९२० रि लाबाला चुरि उल्लेखनीय मुला ।

सन् १९२२ हिन्दे सन १९२८ ला ७ दिङरि म्रिङकोला जनप्रतिनिधिला संख्या ९ गुणासे ल्हेजि । सन १९७० रि संयुक्त राज्य अमेरिकारि म्रिङकोला जनप्रतिनिधि ५ प्रतिशत ताबा दुइरि सोभियत संघरि ३५.६ प्रतिशत मुबा । म्रिङकोलाता ला ब्लि कोलान्हाबा (सुत्केरी) बिदा अक्टोबर क्रान्तिलान उपलब्धि हिन्ना । तिनि रसियाली म्रिङकोला ह्युल ह्युलमाङग्यार दोसि ह्राङ्ला अस्मिता चुङ्बारि (बेच्न) विवश ताबा तामसोर ङ्यान्मा ह्याङ्ता स्हु ल्हागतिमुला । 

सोभियत संघरि समाजवादी डिछ्या मुदेदोना क्युइ, नाङ्साल (बिजुलीबत्ति), यातायात न्होरआकिन्बा च्योच्यो मुबा । गेनाम ह्युल्बाला लागिरि फेबा विश्वविद्यालय स्हेङ्बाला मुबा । क्लाङ्छ्योङ (खेलकुद)दा प्राथमिकता पिन्बाला मुबा । बिजाबुमोला विकासला खाम्बातेन क्लाङ्छ्योङला लिरि किन्बाला मुबा । सेमताङ्ला लागिरि (मनोरञ्जनको) ह्रोल्ज्याङ (सङ्गीत)ला साधन क्योङ नागरिककादेता योनालासि बोलाब मुबा ।

अक्टोबर क्रान्तिला चोहो लेनिनसे क्रान्तिला लागिरि गोर्कि क्रान्तिकारी पार्टी तोमुला सुङ्स्ह्युजि । क्रान्तिकारी पार्टी बिबा संघर्षला मेरि फाइ दोबा पार्टी हिन्ना । पुँजीवादी थेन प्रतिक्रियावादी राज्यसत्ता लिब्रो छेबारि हाम्बा पार्टी । बोल्शेभिक पार्टी आरेबा हिन्साम तत्कालीन परिस्थितिरि रुसरि क्रान्ति सम्भव आरेबा । क्रान्तिला लागिरि न्हाङ्ला थेन फिग्र्यापला परिस्थिति डिक्दोमुला । क्रान्तिला लागिरि स्यानह्युल (अन्तर्राष्ट्रिय) परिस्थितितेन छ्याम ह्युलला ह्युल्बा क्रान्तिला लागिरि तयार तादोमुला । ह्युल्बाता तयार लाबा गे क्रान्तिकारी पार्टीला हिन्ना । चुसे क्रान्ति योना तामुला । माक्र्ससे पाङ्स्ह्युमा ह्राङ– ‘क्रान्तिमि तिरे अवश्याम्भावी ताला तासाइ थे गाइना थेन योनाला ङ्योइबा जेक्खेन हिन्ना । 

हालाइसे तोसि थेन आतोसि क्रान्ति थेनआता । क्रान्तिता योना लाबा गे क्रान्तिकारी पार्टीसे लामुला ।
ङ्हिछारि विचारधारात्मक संघर्ष । लेनिनसे हाइमाइ नोन सिद्धान्तरि सम्झौता आलानि । संसदला चुनावरि बो किन्जि ।

ट्रेड युनियननि ल्हागतिजि तासाइ सत्ता बाङ्लासि जेक्खेन ब्लिङ्बारि हाम्ला  बिबारि लेनिन दृढ मुबा । प्रतिक्रियावादी वर्गता गोना लासि थेन बहुमत–अल्पमतला क्लाङरि कोल्सिसत्ता यारि किन्बारि हाम्ला बिबा हाइमाइ आडान्नि । चुला लागिरि विचारधारात्मक संघर्ष सातान कायम थान्जि ।

अक्टोबर क्रान्तिला ग्युइसेरला सोमछारि क्रान्ति कुन्दुरनाङ समझदार थेन बहादुर क्रान्तिकारीसे लासेदा आहिन बरु ल्हानान गेनाम ह्युल्बासे लामुला बिबा हिन्ना । अराजकतावादी सिद्धान्तसे सर्वहारा क्रान्तिला नेतृत्व लाआहाम । नेकपा माओवादीसे जनयुद्धला मिनरि अराजकतावादी सिद्धान्त पुइसि सशस्त्र युद्ध लाजि तासाइ लिच्छारि हतियार न्हासि पुँजीवादी संसदीय भासरि ह्राङ्दा क्योङ ब्लुम्जी ।

ब्लिछा ग्युइसेर क्रान्तिलिच्छा नोन वर्गसंघर्ष थेन गेनाम ह्युल्बाला अधिनायकत्व कायम थान्दोला बिबा हिन्ना।
लेनिनसे अक्टोबर क्रान्तिला निचोड तेसिकेन कादे रेमदोना स्पष्ट ताना लाबा मुला कि वर्गसंघर्ष थेन गेनाम ह्युल्बाला अधिनायकत्व हाइमाइ थाम्लेगो बिसिमाम । चुदा म्लेबाला अर्थ हिन्ना, पुँजीवादी प्रजातन्त्र थेन शान्तिपूर्ण संक्रमणला भ्रमजालरि फस्दिबा थेन क्रान्तिला ग्याम म्लेबा ।

तिनि सोभियत संघ फुप्पाला (विघटन) मुला । समाजवादसे अस्थायी ब्रेबा व्यहोरतिबला मुला । तासाइ दोङरापरि ल्होलो क्रान्तिता दुल्बाला मुला । दास विद्रोह ७–८ ग्यार्जा दिङ्दोना दुल्बान हिन्ना । सामन्त वर्ग जिन्ना लाबारि पुँजीपति वर्गता ग्यार्जा ब्लि दिङ ल्हागतिबान हिन्ना । ह्याङ निराश तादोबा तिगाइ कारण आरे ।

अक्टोबर क्रान्तिला महत्व थेन ग्युइसेरदा सेमरि थान्सि नेपाली साप्रा जेबा क्रान्तिला दिशा पत्ता ल्हागाब लाबा जिम्मा ह्याङ छार युवा पुस्तारिन मुला । म्हि समाजला दोङरापलान गोर्कि युगान्तकारी घटनाता डान्बाला अर्थ चुन हिन्ना । गेनाम प्राङ्बो नेपाली ह्युलला थोरि अन्याय थेन अत्याचारता क्लेसि क्रान्तिला ह्राङ्लि (स्वरुप) थेन ग्यालम ङोसेबारि तिनिला गेताङ्से ह्याङ्ता लोप्सि निर्देश लाबा मुला ।

काभ्रे