ग्युइसेर बिबा ग्युइ हिन्ना । ग्युइसेर क्योङ केवाला तयारी हिन्ना । नेल्सन मण्डेलासे बिबा मुला– ‘ग्युइसेर थेह्राङ्बा बाङ्बा हतियार हिन्ना, थेला ह्रोग्याम्से ओम प्रयोगग्याम एसे जाम्बुलिङ पोबारि खाम्ला ।’

थेतासि सामाजिक थेन व्यक्तिगत कोणग्याम्से च्यामा ग्युइसेर बिबा म्हिदा थेला ख्यारख्युर अनुकुल ताना लाबा जेक्खे आहिन थेदा ह्राङ्ला वातावरण गोबा तालिम पिन्बा हिन्ना । ओसेम, थेदा पोबा बाङ पिन्बा नोन हिन्ना ।

उत्पादन श्रमतेन थुइबा न्होरआकिन्ना (निःशुल्क), अनिवार्य थेन वैज्ञानिक ग्युइसेर नोन समाजवादी ग्युइसेर हिन्ना । समाजवादी डिछ्यासे पुँजीवादी डिछ्यादा क्योङ्लिरि पोसि दुइआन्सार आधुनिक थेन प्रगतिशील कर प्रणाली ल्हागाब लाला । ग्युइसेरदा उत्पादन थेन श्रमतेन डिक्ना लाला । समाजला मुतेबा पोबा थेन आदर्श ओसेम सिर्जनशील समाज स्हेङ्बाला लागि उपयोग लाला  । बिजाबुमोजुगुला ग्युइसेरला लागि तोबा मुतेबा ग्युइसेरला जिम्मेवारी राज्यसे किन्बान समाजवादी ग्युइसेरला विशेषता हिन्ना । समाजवादी ह्युलजुगुसे च्याङ्ना दुइरिन लाबा न्होर, सामाजिक प्रगतिला मुख्य कारण क्रान्तिलिच्छा लागू लाबा थेर्ला ग्युइसेर डिछ्या हिन्ना ।

समाजवादरि ग्युइसेरसे मेसिन आहिन, म्हि केना लाला ।

कार्ल माक्र्ससे सुङ्बा आन्सार, ‘समाजवादला लक्ष्य बिबा मुतेबाला ठ्वाङ्बा  विकासरि मोक्कोनला ठ्वाङ्बा निहित ताबा डिछ्या हिन्ना । याखारगि चुह्राङ्बा न्होर डिछ्यारि आधारित समाज हिन्ना, थेसे सामाजिक उत्पादक बाङ्ला उच्चतम विकासला छ्याम म्हि जातिला कादेखाम्दे नोबा थेन समतापूर्ण विकास सुनिश्चित लासेला मुला ।’

तिनि प्रचार माध्यम, धर्म आसन थेन प्रवचन कक्षा ह्राङ्बान लोप्खाङ नोन शासक वर्गला नियन्त्रणरि मुला । थेसे थे नियन्त्रणदा ह्राङ्ला फाइदाला लागि प्रयोग लाला । पुँजीवादसे प्राविधिक नाम (सीप) ह्रिला ओसेम थेला लोप्खाङ्जुगुसे थेनोन आन्सार तालिम याङ्बा म्हिजुगु उत्पादन लाला । थेदा खाराङ्बा गुण मुबा म्हि तोला, थेला लोप्खाङजुगुसे ओस्बान तोसोला म्हि उत्पादन लाला । बिले, पुँजीवादसे ग्युइ आरेबा, कुल्मा ङ्यान्बा थेन आङ्योइबा म्हिजुगुग्याम ह्राङ्ला स्वार्थ छ्योसेला म्राङ्बा मुला । थेतासि थेसे गेनाम वर्गदा नोन थेनोन दुर्दशारि ताइना लाबा मुला ।

कम्युनिष्ट घोषणास्योरि उल्लेख लाबाह्राङ, ‘समाजरि सामाजिक परिस्थितिजुगुग्याम ग्युइसेर संचालनला प्रथा कम्युनिष्टजुगुला आविष्कार आहिन । कम्युनिष्टजुगुसेम जेक्खे थेला संचालन, हस्तक्षेप थेन नियन्त्रणला लिदा पोसि ग्युइसेरदा शासक वर्गला प्रभावग्याम मुक्त ताना लाबारि म्हाइला ।’

चुला अर्थ खाजिबा राज्य डिछ्यारि आधारित समाज मुला, थे समाजतेन जेबा ग्युइसेर संचालनला प्रथादा राज्यसे निश्चित लासि किन्बा लाबा ताला । बिले, कादेह्राङ्बा पुँजीवादी ह्युलजुगुरि अन्धविश्वासरि आधारित धार्मिक ग्युइसेर, अवैज्ञानिक थेन अव्यवहारिक ग्युइसेर दातेदोना नोन थान्चिबा म्राङ्मुला ।

ग्युइसेरदा निजिकरण लासि ग्लुबाचुङ्बा ओसेम नाफा छाबा बस्तु स्होबा लाला पुँजीवादी डिछ्यासे । ग्युइसेररि नाफा छाबारि ग्रेनग्रेन पुँजीपति वर्गजुगुसे लगानी लाला । पुँजीवादी डिछ्यासे निजि लोप्खाङतेन विश्वविद्यालय थेन स्यानह्युलला विश्वविद्यालयजुगु सुताइ ठ्वाङ पुङ्सि ग्युइसेररि व्यापारीकरणदा प्रोत्साहन थेन ल्हेना लापिन्बा ताला । रोलि ग्युइसेरदा महंगो स्होला, ग्युइसेर महंगो तामाहेन्से प्राङ्बो गेनाम किसानला जाजामेजुगुसे ह्राङ्ला म्हान्बा, क्षमता तासि नोन न्होर आरेबा कारण डोबा अवसर म्हासिमाम ग्युइसेरग्याम कातोबा बाध्यात्मक परिस्थितिदा नाचिबा ताला । खामआखाम मावि तहदोनाला ग्युइसेर किन्साइ नोन नोबा ग्युइसेर बिसाम प्राङ्बो ह्युल्बाला जाजामेजुगुला लागि मुला रोरो दोनिला ।  

पुँजीवादी डिछ्याला विकृत, विसंगति थेन शोषणदा नुप्ना लासि शोषित पीडित प्राङ्बो श्रमजीवी वर्गदोना ग्युइसेरला याङ्ताम थेन पहुँच दोना लाबारि पुँजीवादी शासक वर्गला नियन्त्रण थेन प्रभावग्याम मुक्त लासि ग्युइसेरदा राज्यला दायित्व अन्तरगत थान्सि समाजवादी डिछ्यासे संचालन थेन नियन्त्रण लाला ।

थेनोन आन्सार ग्युइसेर ठिम ल्हागाब लाला । समाजवादी डिछ्यारि सरकारसे ग्युइसेर सामाजिकीकरण लासि न्होरफाआतोबा थेन अनिवार्य स्होला । ग्युइसेरदा मुतेबा पोबाला देनःदाला लिरि ङ्हाच्छा बाला । राज्यसत्ता ब्यान्बारि खाराङ्लासि गेनाम वर्गरि राजनीतिक थेन वर्गीय चेतना तोला, ओस्बान लासि समाजवाद स्हेङ्बाला लागि समाजवादी ग्युइसेर तोला । ग्युइसेर आरेना न्हा समाजला विकास सम्भव ताला, न्हा समृद्धि नोन । ग्युइसेर क्रान्तिला निर्णायक तत्व हिन्ना ।

समाजवादी ग्युइसेरसे नागरिकजुगुरि सामुहिक भावनाला विकास लाला । पुँजीवादी समाजरि सामुहिक हित बिमा व्यक्तिगत हितदा बाङ्पिन्ना । समाजवादी समाजला उन्नति थेन प्रगतिग्याम व्यक्तिसे होराङ्नोन प्रगति लाला बिसि गोबा ताला । समाजवादी ग्युइसेर डिछ्यासे ‘ङाला जाजामे’ला ग्लारि समाजला जाजामे बिबा भावनाला विकास ताना लाला । व्यक्ति समाजला सम्पत्ति हिन्ना व्हा म्हि जातिलान सम्पत्ति हिन्ना बिबा भावना नोन समाजवादी भावना हिन्ना । समाजला अस्तित्व आरेना खालाइ छार्बा थेन सोबारि आखाम ।

समाजला उन्नति थेन प्रगतिला लागि ग्युइसेरदा उत्पादन थेन श्रमतेन थुइतोला । समाजवादी ग्युइसेरसे गेनामफिरि आदरभाव खाना लाला ओम साक्षर वर्ग ओसेम लोप्बोनजुगुदा उत्पादनमुखी गे लाबारि उत्साहित लाला । साक्षर वर्ग बिबा डाक्टर, इन्जिनियर, वैज्ञानिक थेन मुतेबा नुर खेन्पोजुगुदा ल्होलो तोसोला उद्योग, कलकारखाना थेन आविष्कार केन्द्रजुगु स्हेङ्सि उत्पादनमुलक गेरि समर्पित ताना लाबा समाजवादी सरकार थेन समाजवादी शिक्षा डिछ्याला प्रमुख दोखाङ ताबा ताला । समाजरि मुबा साक्षर स्होबारि सीपमुलक तालिम कक्षाजुगु, म्हुनादुइला प्रौढ कक्षाजुगु, गेनामजुगुला लागि मजदुर लोप्खाङ थेन किसानला लागि किसान लोप्खाङजुगु स्हेङ्सि उत्पादनमुलक श्रमरि अग्रसर ताना लातोला ।

ल्होलो तहरि डोबा लोप्बोनजुगुला लागि ह्राङ्से डोबा सैद्धान्तिक ग्युइदा प्रयोगात्मक लिरि व्यवहाररि बाबाला लागि फेबा फेबा प्रयोगशाला थेन कार्यशालाजुगु स्हेङ्सि नाम थेन क्षमतादा ल्हेना लासि श्रमतेन थुइबा नोन समाजवादी ग्युइसेर डिछ्याला लि हिन्ना ।

समाजवादी क्रान्ति लिच्छा चीन, प्रजग कोरिया, क्युबा, रुसला छ्याम स्यान्दो ह्युलजुगुसे समाजवादी ग्युइसेर लागु लासि समाजला मुतेबा पोबा उदाहरण प्रेरणाला लिरि चिबा दोङराप साक्षी मुला । चिनिया नेता माओत्सेतुङसे सुङ्स्ह्युमुबा– ‘ह्राङ्से कालोपाटी थेन सेतोपाटीरि हलो मोइसि अन्न रोना लाबारि आखाम ।’ देन्बारि समाजवादी ह्युलला लोप्बोनजुगुदा ह्राङ्लान पौरखसे ह्युल स्होबारि, स्वाधीन थेन आत्मनिर्भर ताबारि गौरवपुर्ण गे हिन्ना बिबा ग्युइसेर लोप्ला । पुँजीवादसे म्हिदा ब्लेखु स्होला बिसाम समाजवादी डिछ्यासे म्हिदा जाँगरिलो स्होला बिले मिहेनत थेन परिश्रमी दोबारि उत्प्रेरित लाला । बाङ, बुद्धि थेन योग्यता मुनामुनान गे आलाबा ब्लेखु थेन ठगसे चाबारिन आयाङ, श्रमला डेन आलाबाजुगुदा घृणा सुताइ लाला ।

समाजवादी ग्युइसेरला बन्दोबस्त मुलतः समाजवादी राज्य थेन डिछ्यासे जेक्खे लाबा ताला । समाजला जाजाबा समुह थेन च्याङ्ना म्हिजुगुसे जेक्खे ग्युइसेर याङ्बा पुँजीवादी डिछ्याला नोइला क्योन्बा लासि मुतेबाला लागि राज्यसे ग्युइसेरला अवसर पिन्बा ताला । चुदा व्यक्तित्व विकासरि च्योच्यो अवसर नोन बिला । समाजवादी बन्दोबस्त मुबा ह्युलजुगुरि ग्युइसेरदा याङ्तामला लिरि जेक्खे सीमित आला, बरु न्होरआकिन्ना थेन राज्यसे दुर्गम नाम्साजुगुरि सुताइ लोप्खाङ स्हेङ्सि लोप्बोनजुगुदा तोबा सेपा सुविधाजुगु होस्टेल, कापी, कलम, किताब, चाबा, क्वान ह्राङ्बा ल्होलो स्हेजुगुला डिछ्या लासि ग्युइसेरदा अनिवार्य स्होबा ताला । समाजवादी ग्युइसेर व्यवहारिक ग्युइसेर नोन हिन्ना । थेतासि समाजवादी ग्युइसेरला मुख्य दोखाङ बिबा ह्युल्बादा सभ्य, सुसंस्कृत स्होबाला छ्याम पोबा थेन सिर्जनशील नोन स्होबा हिन्ना । समाजवादी ग्युइसेरसे समाजवादी प्रणाली थेन गेनाम ह्युल्बाला क्रान्तिकारी उद्देश्य पुरा लातोला ।

साम्यवादी चिन्तनसे म्हिदा क्रान्तिकारी स्होला । क्रान्तिकारी सेमतेन संघर्षला महत्वपुर्ण हतियार हिन्ना । थेह्राङ्बा सेमतेनसे म्हिदा दृढ ताना लाला, शत्रुतेन जाजाकि नोन आकुर्बा स्वाभिमानी स्होला । मजदुर वर्गला हितला लागि गे लाबारि प्रतिक्रियावादी वर्गला अवशेषजुगुदा नुप्ना लाबारि बाङ पिन्बान क. किम इल सङसे सुङ्बा मुला, ‘ग्युइसेरला मुतेबा थुमरि ह्याङ्से सामन्तवाद थेन पुँजीवादला मुतेबा अवशेषजुगुदा नुप्ना लातोला । थेलिच्छा समाजवादी ग्युइसेर, समाजवादी गेनाम वर्गसे म्हान्बा आन्सार विकास ताला ।’ थेतासि क्रान्तिलिच्छा नोन प्रतिक्रियावादी सोचजुगु लेङ्बान ताला । पुँजीवादी ओसेम सामन्तवादला प्रभावजुगु तिक्खुरि ह्युल्बाला दिमाग ग्याम तेबारि आखाम तासाइ छार सेमतेनला प्रभाव म्हिरि खेबाः सेमतेनफिरि अविश्वास केना लाला । क. किम इल सङसे सुङ्माह्राङ ग्युइसेरदा क्रान्तिकारी अभ्यासतेन थुइतोला । ग्युइसेरदा व्यवहारतेन थुइमाहेन्से जेक्खे चुसे ह्राङ्ला दोखाङ छ्योना लाला ।

समाजवादी शिक्षारि नागरिकजुगुरि कम्युनिष्ट ह्रिक्पा थेन ल्हुइज्योला विकास लाबा, सर्वहारा अन्तर्राष्ट्रियवादला विकास लाबा, समाजवादी ह्युलभक्त भावनाग्याम प्रेरित लाबा, शैक्षिक पाठ्यक्रम ओसेम छ्योइला सुताइ डिछ्या लाबा ताला । 
वैज्ञानिक थेन प्राविधिक ग्युइसेर समाजवादी ग्युइसेर डिछ्यारि ताला । प्राविधिक थेन सांस्कृतिक क्रान्तिसे समाजवादी डिछ्या स्हेङ्बारि ग्रेन भुमिका क्लाङ्ला । प्रजय कोरिया, चीन, क्युबाला छ्याम स्यान्दो समाजवादी ह्युलजुगुसे लाबा आविष्कारजुगु ल्होलो भुउपग्रहजुगु, अन्तरिक्षा यान थेन ल्होलो यान्त्रिक उपकरणजुगुला स्हेङ्बा, परीक्षणरि सफलता याङ्बा कारण ग्युइसेरदा वैज्ञानिक थेन प्रविधियुक्त स्होबासेन हिन्ना ।

(छिगला अर्थ : ग्युइसेर– शिक्षा, क्योङ– पूर्ण, केवा– जीवन, बिजाबुमो– बालबालिका, नाम– सीप, गेनाम– श्रमिक/कामदार/मजदुर, छाबा– कमाउने, रोलि– फलस्वरुप, न्होर– आर्थिक/पैसा, नाबा– भोग्नु/सहनु, रोरो– फल, नुप्ना– अन्त्य, ठिम– नीति, दोखाङ– लक्ष्य/गन्तव्य, क्योन्बा– उपचार, याङ्ताम– अधिकार, सेमतेन– विचार, थुम– क्षेत्र, खेबाः– पुरानो, ह्रिक्पा– आचरण, ल्हुइज्यो– जीवनशैली, ।)

(ब्रिखेन लोप्खेन हिन्ना ।)

दोःबा : यकिना अगाध