छारिब्योनकादे आज्याबा ग्याम आब्राना ह्युल थेन ह्युल्बाला सेवा लासि ब्रातोबा दुइ हिन्ना दाते । खालाइसे दिम स्होमा दा आरेसाम दिम राप्बारि आखाम्बा ह्राङ छारिब्योन आरेसाम ह्युल स्होबारि आखाम । तासाइ विडम्बना सरकारला कुर्सीरि टिबा शासककादेसे भ्रष्टाचार लाबासे लामा ह्युल्बाला छ्याम छारिब्योनकादेसे स्हु याङ्जिबा मुला । ह्युलला छाब्यिोनकादेदा लला शासककादेसे राजनीतिक थु आपिन्ना, रोजगार गेनाम आपिन्ना ख्योल्बा ग्याम ब्रापुङ्बा मुला । उदाहरणला लागि बाप, आइराक थुङ्पुङ्बा, गाँजा ह्राङ्बा ल्हुइ न्होङ्ना लाबा स्हे खेतीदा झन प्रोत्साहन लाबा थेन भ्रष्टचारीदा ह्रवा लाबा गे सरकारसे लाटिबा मुला । थेह्राङ्बान ह्युलला पुँजीवादी डिछ्याला कारणसे ह्याङ्ला छारिब्योनकादे फिरग्याप म्हिला ह्युलरि गेदोइ म्हाइसि ब्रातोबा बाध्यता मुला । चु बाध्यता ताना लाबा गे फ्याक्पोजे च्याबा सरकारला कुर्सिरि टिबा शासककादेला हिन्ना ।

सरकाररि निबा पार्टीला गोबोनकादे दलाल थेन पुँजीवादी डिछ्याला कारणसे ह्याङ्ला छारिब्योनकादेसे स्हु याङ्जि । ह्याङ्ला नेपालरि राणा शासन थुम्बा दुइरि ह्राङ्बाङ ताबा भारत थेन चीन दान्ते खराङ्बा दुइरि मुला ? ह्यङ्ला ह्युलला दुइ खाराङ्बा मुला ? ह्युलल्बाकादेसे आन्सार सेमतेन लाबारि खाँचो मुला । ह्याङ्ला खिम्सा ह्रो चीनरि क्रान्ति ताबा ङ्हाछा चिनियाँ ह्युल्बाकादेदा जपानीकादेसे नगिदा ह्राङ्बा व्यवहार लाबा मुबा । दान्ते चिनियाँ ह्युल्बाला ल्हुइ पोसि फेजिन्बा मुला । थे बिवा नेतृत्व लाबा पार्टीला सेमसे थेन पार्टीरि मुबा गोबोनकादेला सेमसे हिन्ना । खाइमा चीनरि कम्युनिष्ट पार्टी स्हेङ्सि माओत्सेतुङला नेतृत्वरि चिनियाँ क्रान्ति ताजि थेदुइ हिन्छे चिनियाँ ह्युल्बाकादेला ल्हुइ पोसि दान्ते न्होरला दुइ तोरतोर दोबान मुला ।

होराङ्तासि ह्याङ छारिब्योनला छ्यामरि मोक्कोन ह्युल्बाकादेसे न्होरसे बाङ, सत्ता थेन ठिमफिरि याङ्ताम किन्बारि म्हाइबा, ह्राङ्लाजे फाइदा च्याबा पुँजीवादी डिछ्याला लिब्रो मोक्कोन ह्युल्बा डिक्सि संघर्ष लातोबा हिन्ना । ‘मोक्कोन ह्युल्बाला लागिरि संघर्ष लाबा गेनोन ग्लेठिम हिन्ना ।’ थे ग्लेठिम पार्टीकादेला ह्राङ्ह्राङ्ला सिद्धान्त थेन वर्गीय सेमतेन ताला । थे सिध्दान्त गुङरि ह्याङ गेदोइ लासि स्ह्यो ङ्यासेला छाक टाराब लाबा वर्गला ह्युल्बाकादेला हितरि स्हेङ्बा पार्टी  गिक हिन्ना नेपाल मजदुर किसान पार्टी (नेमकिपा) । चोदे सिद्धान्त थेन वर्गीय देनः अतानि बिसाम थे पार्टी आहिन्ना याखरगि न्हान थेन भिड जेक्खे हिन्ना । होथे भिडकादे दान्ते पुँजीवादी पार्टीकादे काँग्रेस, एमाले, माओवादी थेन स्यान्दो सरकारला कुर्सिरि टिबा पार्टीकादेरी थे हुल मुला तासाइ चाङ्बा सिद्धन्ता थेन बिचार थे पार्टीकादेला अरे । चाङ्बा सिद्धन्ता मुबा हिन्साम चुनावला दुइरि ह्युल्बादा ओन्बा आश्वासनकादे छ्योना लातोबा हिन्ना । तासाइ सोझो ह्युल्बादा लुसि आश्वासन पिन्जि ओम चुनावरि डासि निसि ह्युल्बादा म्लेजि । सरकारला कुर्सी जेक्खे डान्जि । थे ताबासे क्यार ह्याङ ह्युल्बाला छ्यामरि छारिब्योनकादेसे स्हु याङ्जिबान मुला  ।

शोषण गिकसे स्यान्दोदा हेप्तिबा, ह्याङ प्राङ्बोजुगु दिनम्हुन गे लातोबा, कादे गे लासाइ ज्याला च्याङ्ना पिन्बा, किसानजुगुदा पुँजीवादी दोप्ताकादेसे थेराङ्बा लेबाफेबा लाबासे क्यार, थे गेनाम वर्गला मुक्तिला लागिरि नेमकिपासे माक्र्सवाद, लेनिनवाद थेन माओत्सेतुङ विचारधारदा किन्सि ह्युल्बाला प्रजातन्त्र, समाजवाद हिन्छे साम्यवादरि दोबा दोखाङ (लक्ष्य) किन्सि पार्टी स्हेङ्जि । पार्टी स्हेङ्मा हिन्छे दान्दोना सरकारला प्रतिपक्षरि टिसि ह्युल थेन ह्युल्बाला सेवा लाबान मुला विसाम छ्यमरि ह्युलला गुग्ला दोनान दोसि  ह्युल्बाकादेदा राजनीतिक थु पिन्टिबा मुला । ह्युल्बाला जाजाकोलाकादे लोप्खाङरि ओराङ नोन निम्याङ्तोबा, ह्युल्बाकादे नाबाछेबा तामा होराङनोन मानखाङरि निम्याङ्तोबा थेन फिरग्याप म्हिला ह्युलरि गेदोइ लासि स्ह्युबा ज्योज्योआले थेन नानाआङाजुगुदा ह्यङ्लन ह्युलरि गेदोइला डिछ्या राज्यसे लातोबा बिबा सेमतेन थेन ह्रिबा (माग) नेमकिपाला हिन्ना । तासाइ  सरकारला कुर्सीरि टिबा शासककादेसे ह्युलरि रेमिट्यान्स बाबा पालेरि छारिब्योनकादे खाडी ह्युलरि पुइटिबा मुला ओम थेनोन छारिब्योनकादेसे पुइकाबा रेमिट्यान्सजा सरकारला कुर्सीरी टिबा शासककादेसे भ्रष्टाचार लबारि ठिक मुला । स्हुला ताम पाङ्तोमा शासककादेला कारणसे खालाइ खालाइ ज्योज्योआले, नानाआङाजुगु फिरग्याप म्हिला ह्युलरि गेदोइ लाना लाना दुर्घटनारि परतिसि सिबा, म्हाबा तासि एयरपोर्टरि बाक्सरि छेन्दे बाबा ह्याङ्से म्रङ्टिबा मुला । ह्युलरि लेङ्बा छारिब्योनकादेतान शासककादेसे लुसि आश्वासन पिन्बान चुनावरि खालाइदा जाजाकार न्होर पिन्बा, खलाइदा बाप आइराक पिन्सिनाम दोसिदोसि थेनोन पार्टी, थेनोन शासककादे शासनसत्तारि चिटिबा मुला ।

थेह्राङ्तासि ह्यङ ह्युल्बाला छ्यमरि छारिब्योनकादेदा रा, नागा, पशुपक्षी ह्राङ म्हान्सि ग्लुबा, चुङ्बा म्हान्बा, चुनाबला दुइरि शोषण लाबा शासककादे थेन पार्टीकादेदा ङोसेसि दोसि खाबा चुनावकादेरि चु पुँजीवादी पार्टीकादेदा ब्याङ्नोन तोला । दारेम ह्याङ छारिब्योनकादे पुँजीवादला ख्योल्बा ग्यामरि आब्राना समाजवादला ग्याम चुङ्सि ब्रातोबा दुइ खासिजिन्जि तिल्दा बिसाम सरकारला कुर्सिरि टिबा शासक, गोबोनकादेसे भ्रष्टाचार लाबा थेन ह्युलला सर्वभौमसत्ता अमेरिकी सम्राज्यवाद थेन भारतीय विस्तारवाददा च्योल्बा गे बिमा स्यान्दो तिलाइ लाबा अरे । ह्युलरि गेदोइ आयाङ्ना बुमसे बुम छारिब्योन ज्योज्योआले, नानाआङाजुगु म्हिला ह्युलरि टु ब्योङ्बान स्हु नाटिबा मुला बिसाम ह्युलला ह्युल्बाकादे नाबाछावा दुइरि न्होर आताना मान सुताइ लाआखम्ना ल्हुइ निटिबा मुला । ह्युलला भ्रष्टाचारी गोबोनकादे हिन्साम फो जागि स्वुहासाइ फिरग्याप ह्युलला मानखाङरि निसि महंगो उपचार लाटिबा मुला । ओम ह्युल्बाला जाजाकोलाकादे ल्हानान लोप्खाङ ग्याम थारेङ मुला । थे लोप्खाङरि डोबारि निआखाम्बा बिजाबुमोकादेदा होराङ्नोन डोबारि लोप्खाङ्ला डिछ्या लाखाम्बा आरे राज्यसे । होराङ्तासि नेमकिपासे गेदोइ लाबा ह्युल्बला नेतृत्वरी शासन ताबा समाजवादी गणतन्त्र स्हेङ्बारि संघर्ष लाचिबा मुला । तिलो गिक ह्याङ्ला ह्युलला सिमाना भारतीय विस्तारवादसे नाङ्बाला नाङ्बान मुला । भारतीय विस्तारवादसे सिमाना नाङ्सि सिमाना ङामरि चिबा नेपाली ह्युल्बाकादेदा भारतीयसे लाबा ज्यदाती सरकारला कुर्सीरि टिबा शासककादेसे आम्राङ्बास्हो लाचिबा मुला ।

थेराङ्नोन लासि लिच्छाला दुइरि ह्युल्ला सार्वभौमसत्ता किन्बारि अमेरिकी साम्राज्यवादसे विकासला पालेरि एमसिसि परियोजना पुइकाजि । थे एमसिसिरि सरकारला कुर्सीरि टिबा भ्रष्टाचारी गोबोनकादेसे थो ग्लोङ्बान मुला । नेमकिपासे लिब्रो लाना लानान दलालकादेसे बहुमतला आडरि संसद ग्याम पास लाजि । थेसे लाबासेक्यार एमसीसी परियोजना न्हाङरि रातमाटे थेन लप्सेफेदीला तामाङ नाम्साला छ्यामरि मोक्कोन ह्युलदाइ जोखिमरि ताबासे ह्युल्बाकादेसे लिब्रो लाजिबान मुला । तासाइ बिडम्बना ह्युलला सर्वभौमसत्ता रक्षा थेन लप्सेफेदीला तामाङकादेला नाम्सा ह्रवा लाबारि म्हाइमा शासककादेसे लिसोन पुलिस ल्हागाब लासि छेक्पा ग्याङ्बा लाचिबा मुला । थेतासि दारेम छारिब्योनजुगुसे गोसि चु शासककादेदा ब्याङ्नोन तोला । ओम ह्युल्बाला छ्यामरि छारिब्योनकादेसे समाजवादी डिछ्या बाबारि गोनोन तोला । समाजवादी डिछ्या न्हाङरि जेक्खे मोक्कोन जात, धर्म, लिङ्ग, न्होरला दुइ, ह्राङ टिबा ग्ला थेन ह्युलला  सार्वभौमसत्ताला ह्रवा ताला ओम छारिब्योनकादेसेन स्हु आयाङ । मोक्कोन ह्युल्बासे सुखला दुइ खाजि म्हान्ला ।

(छिगला अर्थः स्हु– दुःख, छारिब्योन– युवा, ख्योल्बा– गलत, ह्रवा– ह्राङ्बाङ– स्वतन्त्र, दुइ– अवस्था÷समय, सेमतेन– विचार, ग्लेठिम– राजनीति, सेमतेन– विचार, देनः– आधार, चाङ्वा– स्वच्छ, दोप्ता– मालिक, दोखाङ– लक्ष्य, पालेरि– बाहना, ह्रिबा– माग, छेन्दे– लास, ख्योल्बा– गलत, बिमा– बाहेक ।)

काँक्राबारी, भक्तपुर ।