म्हि समाजला विकास ताङरि दाङ्बो साम्यवादी समाज लिच्छाला खाजिबाइ युगरि केवा सोबाला लागि तोबा स्हेजुगु उत्पादन लाबा उत्पादनला साधनजुगुला स्वामित्व समाजला अधिनरि आचिनि । केना लाबा स्हेजुगु नोन तोबा आन्सार आहिन, नाफा नोक्सानला देनरि ग्लुबाचुङ्बा थेन बोठाबा प्रणाली चलप ताजि । समाजला ह्रोम्हि दोसि नोन व्यक्तिन सर्वेसर्वा दोजि । समाजदा ज्याबा, आज्याबाला ख्याल आलानि । थेसे लामा शोषण, उत्पीडन ओस्बान चिजि ओम म्हि म्हि गुङरि लेबाफेबा, च्योच्योआताबा थेन कलला ठिम चिजि । छार्बाकेन लाबा छार उत्पादक बाङ गेनाम वर्ग समाजला मोक्कोन बिमा ग्रेन बो तासि नोन म्हि केवाला लागि तोबा स्हेजुगु केना लाबा किसानजुग–गेनामजुगुसे सातान आछ्योबा नातोजि । समाज च्योच्यो लिरि शान्तिपुर्वक ङ्हाच्छा वाङ्बारि आखाम्नि । रोलिरि– फलस्वरुप, छार समाज डिछ्या ह्रिबारि चुजि । गेनामजुगुसे दोप्ताला ह्रेङ्बा शोषण लिब्रो संघर्ष लाजि । किसानजुगु सामन्ती थेन जमिन्दारी प्रथा लिब्रो विद्रोेहरि थोन्जि । चिन्तनशील थेन परोपकारी म्हिजुगुसे क्योङ म्हि जातिला हित लाबा छार समाज डिछ्याफिरि सोंच तिबारि चुजि । मानव समाजला मुतेबा बिमा सक्रिय, परिश्रमी थे छार्बाकेन दुइरि मुबा गेनाम वर्गदा शासक वर्गला लिरि स्हेङ्बा छार समाज डिछ्याला परिकल्पना थेन व्याख्या लाजि ।

काल्पनिक ढंगसे उन्बा च्योच्यो मुबा, शोषण आरेबा, समाज डिछ्यादा काल्पनिक समाजवाद बिला । वैज्ञानिक समाजवादला केवा ताबाबिमा ङ्हाच्छा काल्पनिक समाजवादी विचारधारा फेजि । काल्पनिक रुपरेखारि आधारित तासि प्रयोगात्मक लिरि नाम्सा स्होबा प्रयास नोन लाजि । बेलायतला आन्दोलन थेन फ्रान्सेली राज्य क्रान्तिला अनुभवजुगु थेन गेनाम वर्गला देन्बा केवा, पुँजिपति वर्गला शोषण, दुल्बा, छल, प्रपन्च थेन धोका म्हि समाजरि विकसित तासि खाबा आर्थिक प्रणाली मुतेबाला व्यापक थेन विस्तृत डोबा, विश्लेषण थेन परीक्षणग्याम समाजवादला वैज्ञानिक देनजुगु तयार ताजि ।

काल्पनिक दर्शनला दुनियारि च्याङ्ना काल्पनिक समाजवाददा ल्हानान ह्रेङ्बा गम्भीर डोबा थेन अनुसन्धान लिच्छा ल्होलो तथ्यपुर्ण कारणला छ्याम सैद्धान्तिक देनजुगु उन्सि वैज्ञानिक समाजवादला सिद्धान्त केना लाजि । वैज्ञानिक समाजवाद याङ्बाला लागि क्रान्ति व्हा सशस्त्र संघर्ष तोला । चु तोसोला संघर्ष बहुमत गेनाम थेन ह्युल्बाला नेतृत्व तासेला ताबासे ल्हाना उत्पीडित गेनाम ह्युल्बा राजनीतिक थेन सैद्धान्तिक लिसे शिक्षित सचेत थेन संगठित ताबाला छ्याम बौद्धिक थेन सांस्कृतिक स्तर रेन्बाा थेन रेना लातोबा ताला । चुनोन परिस्थितिला गुङरि ह्रा्ला डोबा थेन अनुसन्धानला ताङरि माक्र्स थेन एंगेल्ससे अठारौ शताब्दीला भौतिकवादी विचारधारा, पुँजिवादी प्रजातान्त्रिक क्रान्तिला अनुभवजुगु, हेगेलला द्धन्द्धवादी ठिम, फायरबाखला भौतिकवादला मान्यता, काल्पनिक समाजवादी विचारधारा थेन डेबिट रिकार्डो ओम एडम स्मिथला आर्थिक सिद्धान्त ह्राङ्बा नुरजुगुला गहन डोबासे कार्ल माक्र्सदा गोर सोम प्रमुख नुररि म्हाइबा थेन निचोड तेबारि प्रेरित लाजि । चुह्राङ लासि दर्शनशास्त्र, ग्लेठिमशास्त्र थेन अर्थशास्त्र ह्राङ्बा प्रमुख नुररि डोबा केन्द्रित तासिकेन माक्र्ससे समाजरि मुतेबा बिमा ग्रेन संग्यारि मुबा उत्पादन बाङ गेनाम–किसान श्रमजीवि जनसमुदायला आन्दोलनजुगुदा क्योइ स्हिजि । एंगेल्ससे प्रकृतिला द्धन्दवादफिरि गहन अध्ययन लासि समाज विकासला ऐतिहासिक रपरेखा ब्रिस्ह्युजि । डार्बिनला म्हाइबादा पुष्टि लाबान दिमम्हे थेन राज्यसत्ताला केबाफिरि निचोड तेस्ह्युजि । थेलिच्छा वैज्ञानिक समाजवाददोना दोबा ग्याम उन्बा लिरि माक्र्ससे वर्ग संघर्ष, द्धन्दात्मक भौतिकवाद, अर्थशास्त्ररि अतिरिक्त साइला सिद्धान्त छ्यामरि सैद्धान्तिक देनजुगु ङ्हाच्छा बास्ह्युजि । चुह्राङ लासि माक्र्स थेन एंगेल्ससे समाजवाददा आदर्श कल्पनाला तहग्याम वैज्ञानिक धरातलरि राप्ना लाजि । लेनिनसे थेदा गिक्छारेम व्यवहारिक केवारि लागु लासि रुसला सारि समाजवादी डिछ्या स्हेङस्ह्युजि । पुँजिवादी डिछ्या अल्पमतसे बहमतफिरि शासन लाबा डिछ्या हिन्ना बिसाम समाजवादी डिछ्या बहुमत ह्युल्बाला हितरि सर्वहारा वर्गला नेतृत्वरि ताबा शासन डिछ्या हिन्ना ।

वैज्ञानिक समाजवादी डिछ्या माक्र्सवादी सिद्धान्त ओस्बानलिरि सर्वहारा वर्गसे बाङ लासि सशस्त्र संघर्षला गुङग्याम सामन्ती थेन पुँजीवादी डिछ्यादा ध्वस्त लासि राज्यसत्ता ब्यान्ना ओम ह्राङ्ला हुकुम चलप लाला । तिबारिः समाजवादी डिछ्यारि सर्वहारा वर्गला अधिनायकत्व लागु ताला ओम ल्हानान गेनाम वर्गला हितरि राज्यला शासन सत्ता संचालन ताला । चु डिछ्यासे प्राङ्बो, शोषित, उत्पीडित थेन शासित गेनाम ह्युल्बाला हित (मुक्ति)ला लागि उत्पादनला मुख्य मुख्य साधनजुगुदा सामाजिकीकरण लाला ।

व्यक्तित्व विकासरि च्योच्यो अवसर राज्यसे पिन्ना । शिक्षा, स्वास्थ्य क्योङ लिरि निःशुल्क, ल्हुइला श्रम थेन बौद्धिक श्रम गुङ्ला फेबाला नुप्ना लाबा, रोजगारीला सुनिश्चित लाबारि राज्यसे उद्योग, कलकारखानाला स्हेङ्सि राज्यलान स्वासमत्वरि संचालन लाला । खाजिबाइ कारणसे राज्यसे पिन्बा रोजगारीग्याम खालाइ बन्चित तासाम थेदा रोजगारी भत्ताला डिछ्या लाला । योग्यता, क्षमता थेन गुण आन्सारला गे थेन थेनोन आन्सारला ज्यालाला डिछ्या लाला । वर्ग फेबा ब्याङ्बारि वर्गीय व्हाङ ल्हुबाला लागि शोषण आरेबा आर्थिक च्योच्योला छ्यामला समाज डिछ्याला लागि प्रगतिशील कर प्रणाली लागु लाला । बैंक, ग्रेन ग्रेन उद्योगधन्दा, वायुसेवा, यातायातला ह्राङ्बा साधानजुगु राष्ट्रियकरण लाला । किसानजुगुला हितरि क्रान्तिकारी भुमिसुधार लागु लाला ।

दलाल पुँजिपति वर्गदा दण्डित लाबान फिरग्याप ह्युलला पुँजि गोल्छे गोल्छेसे विस्थापित लाला । मुतेबा प्राङ्बा, शोषित थेन पीडित गेनाम वर्गला छेदा सहुलियत व्हा छुट लाबान प्रतिक्रियावादी सरकारसे ह्युल थेन ह्युल्बाफिरि काप्बा छे छारस्होबा क्रान्तिकारी सरकारसे आफासेला खुल्लाम खुल्ला घोषणा लापिन्ना । ह्युलदा स्वाधीन थेन सार्वभौम तोसोसे ङ्हाच्छा बोर्बारि स्वाबलम्बी थेन आत्मनिर्भरतातेन अर्थतन्त्रला विकास लाला ।

माक्र्सवादला क्रान्तिकारी धारदा कोल्ठेङ लाबा थेन जिन्बा लाबा उद्देश्यसे माक्र्सलान चेला एडुअर्डो बर्नस्टिनसे प्रतिपादन लाबा वर्ग समन्वयरि आधारित क्रान्ति लिब्रो सिद्धान्त संशोधनवाद हिन्ना । संशोधनवाद पुँजिवाद न्हाङ्ला अवसरवादी सेमतेन हिन्ना । अवसरवाद बिबा ह्रेङ्बा दुइदोनाला मुल लक्ष्यदा ख्लासि ह्रेच्छाकला स्वार्थ किन्बा गेरि ल्हागतिबा हिन्ना । अवसरवाद नोन गोर ङ्हि तोसोला ताला । गिक्छा, वामपन्थी अवसरवाद थेन ङ्हिछा दक्षिणपन्थी अवसरवाद हिन्ना । क्रान्तिकारी परिस्थिति आस्होचिमान क्रान्ति लाबारि म्हाइबा वामपन्थी अवसरवाद हिन्ना बिसाम क्रान्तिला परिस्थिति तयार तासि नोन क्रान्ति लाबारि आम्हाइबा दक्षिणपन्थी अवसरवाद हिन्ना । चुसे देन्बा कम्युनिष्ट आन्दोलनदा ङ्हाच्छा वाङ्बारि आपिन ओम दिशाहीन स्होबा कुचेष्ट लाला । सिद्धान्तला कसीरि म्याप्सि च्यामा नेपालरि नोन ह्युल्बाला बहुदलीय जनवाददा किन्बा नेकपा एमालेसे कम्युनिष्ट पार्टी आहिन बिनोन तोमा कम्युनिष्ट नोन आहिन । तिल्दाबिसाम गैर माक्र्सवादीजुगु कम्युनिष्ट दोबारि आखाम । एमालेला जबज ओस्सोन बर्नस्टिनला वर्ग समन्वयरि आधारित वर्ग संघर्ष लिब्रो संशोधनवादी सिद्धान्त हिन्ना । कम्युनिष्टजुगुसे क्रान्ति थेन वर्गसंघर्षरि विश्वास लाला । वर्ग संघर्ष थेन क्रान्तिदा ख्लाबाजुगु कम्युनिष्ट दोबारि आखाम । थेतासि ह्युलरि क्रान्तिला वस्तुगत परिस्थिति तयार आताचिमान भारतीय विस्तारवादी शासक वर्गला निर्देशन आन्सार हातहतियार बासि, थेग्याम्सेन तालिम किन्सि ह्युलरि जनयुद्ध थेन सशस्त्र संघर्षला मिनरि बम छेप्सि उपद्र जाना लाबा माओवादी नोन कम्युनिष्ट आहिन, वामपन्थी अवसरवादी हिन्ना । सशस्त्र संघर्ष लाबा मुतेबा कम्युनिष्ट आता तासाइ कम्युनिष्टजुगु सशस्त्र संघर्षरि विश्वास लाला । बिले ‘माओवाद’ बिबा छिग नोन ख्योल्बा हिन्ना । माओत्सेतुङला खाजिबाइ वाद आरे, माओत्सेतुङला विचार जेक्खे हिन्ना । वाद थेन विचार फेबा ताला । माओवाद बिा छिग चिनियाँ कम्युनिष्ट पार्टी थेन माओत्सेतुङ ह्राङ्सेन अस्वीकार लाबा छिग हिन्ना ।

व्यवहाररिः सरकाररि निसि शोषित गेनाम ह्युल्बाला हितरि माओवादी थेन एमाले ङ्हिसन गे लाबा आरे । नेपालीरि याखारगि उखान मुला, ‘म्हे सेसि च्यानदा पोसतिबा’ बिबा ह्राङ लिसोन सरकाररि निसि गेनाम ह्युल्बाला मिनरि गेनाम वर्गदा नोन शोषण लासि पुँजिपति वर्गदा पोसतिसि व्यापक गेनाम वर्गला अहितरि ल्होलो ऐन कानुन थेन ठिम गेताङजुगु स्होबान खाबा यथार्थ दिनि तेबान छर्लङग मुला । उदाहरणला लागि कम्युनिष्टजुगुसे समाजवादी असवधारणा ओस्बान लिला राज्यला स्वामित्वरि उत्पादन थेन बोठाबा गे लाला । तासाइ माओवादी थेन एमाले ङ्हिसेन समाज थेन राज्यला स्वामित्वरि उद्योग, कलकारखानाजुगु ठ्वाङ्बा, योग्यता आन्सारला गे थेन गे आन्सारला ज्यालाला डिछ्या लाबा, शिक्षा, स्वास्थ्य निःशुल्क लाबा, क्रान्तिकारी भुमिसुधार लागु लाबा, उत्पादनला स्हेजुगु सामाजिकीकरण लाबा थेन प्राङ्बोजुगुला छे छुट लासि छेग्याम मुक्त लापिन्बा ह्राङ्बा समाजवादतेन सम्बन्धित क्रान्तिकारी सरकारसे लातोबा चु गेजुगु आलानि । थेतासि चु ङ्हि नोन पार्टीजुगु कम्युनिष्ट आहिन । चुह्राङ्बा छद्मभेषी नक्कली कम्युनिष्टजुगु लिब्रो सैद्धान्तिक लिरि, वैचारिक लिरि, स्हेङ्बा दुइहेन्से सडक थेन सदनरि नेमकिपा संघर्षरत मुला । 
काभ्रे ।
(छिगला अर्थः गेनाम– कामदार÷मजदुर, दाङ्बो– आदिम, केवा– जीवन, देन– आधार, बोठाबा– वितरण, ह्रोम्हि– सदस्य, ठिम– स्थिति, आछ्योबा– अभाव, रोलिरि– फलस्वरुप, डिछ्या– व्यवस्था, दोप्ता– मालिक, लिब्रो– विरुद्ध, क्योङ– सबै, स्हेङ्बा– स्थापित, फेजि– उदय भयो, दुल्बा– दमन, तोसो– किसिम÷खाले, ठिम– पद्दती, नुर– विषय, संग्या– संख्या, दिमम्हे– परिवार, साइ– मुल्य, ओस्बानलि– अनुरुप, तिबारिः – मूलतः, प्राङ्बो– गरीब, काप्बा– थोपरिएको, तोसो– ढंग/किसिम, सेमतेन– विचार, जाना लाबा– मच्चाउने, ख्योल्बा– गलत, अनुरुप– ओस्बान लि, बोठाबा– वितरण ।)

दोःबा : यकिना अगाध