छेप्बा खाबाकेन मुला । ह्याङ्जा ताङ्लिङ, पाङ्ति थेन नाफ्राङजुगु– गोरसोम थरीला बुलुङजुगु तासेला मुला ।

चु गुङरि ङादा खाचिबाजा सेम निमुला बिसि खालाइसे ङातेन ङ्योइजि बिसाम ङाइ ‘छारिब्योनजुगुदा तोबा डोबा’रि ह्राङ खाजिबाइदा नोन सेम आनि बिसि पाङ्आम्याङ ओम थे सोम गुङरि खाजिबादाम सेम निनोन तोला । चुह्राङ्बा दुइरि ङाला कासाल तासेला मुला– ताङलिङजुगु ।

ताङ्लिङजुगुसे का ङ्हाप्मा आज्याना छोर्साइ नोन तिलाइ आबिना सोझोन खासि जिबा थेन्ना तरिका आउदिन स्पष्ट थेन सोझो मुला । पाङ्तिजुगु फेबा ताला । देन्बारि थेन्से स्वा क्याबा तरिकादा आउदिन कोङ्बा छोर्ला तासाइ स्वा क्याबा ङ्हाच्छा थेन्छे टिटिटि लासि ल्हानान दुइदोना भारषण लासि वाक्का ताना लाला । म्हिला का सिप्सि सोबा ताम थेन्ना याङ्ताम न्हाङरि परतिला बिबा ताम थेन्ना टिटिटिसे व्याख्या लाचिबा हिन्ना बिसाम चुमि झान ल्हाना नाइबा ताम हिन्ना । ताङ्बा ताममि चु मुलाकि ङाइ थेन्ना ग्योइ आगो ।

म्हिला यारि परतिबा च्युरगान थेन ताङ्गिजुगु खाइमादाम्मान थेन्ना या ग्याम्से स्योर्बारि म्हाइला । देन्बारि मुरि ग्वाइ थेन सारि च्यान, ल्हुन्दि मुबा गाङ थेन ह्रिरि थेनि म्हिला यारि बिमा च्याङ्नान सुरक्षित मुला । तासाइ नोन थेनिकादे तिल्दा थेह्राङ लाला ओम ? थेनि ह्यार्सि म्हिजुगु मुबा ग्लारिक्यार आखा बरु ग्वाइ, च्यान, ल्हुन्दि मुबा ग्लारिक्यार नोन निबारि म्हाइला । ताबारि खाम्ला ताङ्लिङजुगुसे ह्याङ्तेन व्यवहार लामाह्राङ ग्वाइ, च्यान, ल्हुन्दिजुगुसे थेन्तेन व्यवहार लाला । थेनि (च्यान, ल्हुन्दि) फोख्रेन्मा ह्राङ्दा प्रमाणित लाबातेन षडयन्त्र स्होबारिक्यार आवाङ्ना सोझोन हापछ्योइसि ख्राप्ला । आहारा दोबाजुगुसे नोन ह्राङ आहारा दोबाबिमा ङ्हाच्छा ह्राङ्दा चासाइ नोन ताला, ङान्दा चासाइ नोन ङानि ताङ्बान मुला ओम सोतेदोना थेन आसिदेदोना चुनोन विश्वास थोसि ङानि सोबा मुला बिसि स्वीकार तिआदो । म्हिला जात चु किसिमला टिटिटिरि वाङ्बारि चुमाहेन्से च्युरगान थेन ताङ्गिजुगु म्हिलाजुगुला याग्याम कादे खाम्जि ओते योना च्याङ्ना स्हु मुबा ग्ला दाम्सि ह्योर्बारि म्हाइला ओम चु थेन्ना ग्रेन बुद्धिमानी हिन्ना ।

ल्हानान ङ्हाच्छारि टिटिटि लाजिन्माहेन्से लिच्छारि खाजिबाइ स्हेफिरि चिमा नाफ्राङजुगुसे लाबा मुख्य ताम जाजाकि फोहोर ल्हेम्बा हिन्ना । थेन्से खाजिबाइ पोर व्हा ख्रुम स्याप्जि बिसाम थेरि थेन्छे जाजाकि ल्हाना फाइदा किन्बारि खाम्ला ओम ज्याबा थेन चाङ्मा स्हेरि तिलाइ फोहोर ख्लासि निबा थेन्ना ठिम हिन्ना ।

तिलादाम्मान मुगाइ थेन्छे तिलाइ लाला बिसाम जाजाकि फोहोर व्हा टु ल्हेम्बा व्हा जाजाकि फोहोर काप्सिमाम गे लाला, थेह्राङ ताबासे रुङ्बा डि मुबा म्हिजुगुसे थेन्दा थेह्राङ लाबारि पिन्ना । चिनियाजुगु तिला ताम आगो बिसाम नाफ्राङजुगुसे नोइला किटाणुजुगु ल्हाना ल्हेना लाबारि आखाला, थेतासि नाफ्राङ नुप्ना लाबा आन्दोलन खाम्देदोना ओते ज्याबा आहिन ओम थेन्छे ह्रेङ्बा केवा सोबारि याङ्सेला मुला ओम थेन्छे झान ल्हाना ह्राङ्ला संख्या ल्हेना लाबारि म्याङ्सेला मुला । तासाइ तिला ताम प्रष्ट मुला बिसाम असल, ज्याबा थेन चाङ्मा स्हेरि फोहोरि ख्लाजिन्माहेन्से ताफ्राङजुगु ह्राङ्से फोहोर लाबा स्हेला ख्यारख्युर फ्याङ्बा थेन थेदा ङोसि च्याबा आला । थेन्तेन चोेदे शिष्टताजा मुला ।

ओन्मा थेन दातेला भलाद्मीजुगुसे म्हिजुगुदा पशुला मिन पिन्सिे केबा लामुला । तासाइ देन्बा ताम तिला हिन्ना बिसाम बुलुङजुगु सुताइ नोन ल्हानान तामरि म्हिजुगुला लागि लायक नमुनाजुगु हिन्ना ।

(छिगला अर्थः स्हु– दुःख, चाङ्मा– सफा, ठिम– नियम, नोइ– रोग, नुप्ना– निर्मुल, केबा– गाली, खेबाः– पुरानो, पाले– निहु, छेप्बा– गर्मी ।)

–४ अप्रिल १९२५

(८ जनवरी १९२५रि, पेकिङ तामसोर परिशिष्टसे लु सुनतेन मुतेबा लोप्बोनजुगुसे डोतोबा १० वटा छ्योइजुगुला सिफारिस लापिन्बारि म्होइजेन लामुबा । तासाइ लु सुनसे थेह्राङ लासि सिफारिस लाबाला बो, छारिब्योनजुगुदा खेबाः शास्त्रजुगु डोपुङ्बाला पालेरि प्रतिक्रियावादी सिद्धान्तजुगु ल्हेना लाबा हसि ह्राङ्बा बुद्धिजीविजुगुदा झटारो छेप्सि गिक्खे ब्रिताम ब्रिस्ह्युमुबा ।)

दोःबा : यकिना अगाध