म्हि
न्हा ए अज्ञात अजंम्बरी मुला ? 
न्हा ए निराकार मुह्राङ 
अमर मुला ?
न्हा ए ह्रि, स्योङ, ब्रा–ब्लेला 
स्वामित्व थोबा 
गाङ हिन्ना । 
न्हा ए खासु, वर्षा, मनसुन हिन्ना ?
ए–
क्योङ दिङ स्यासि स्यासि फ्लिकदोसि खाबा 
मुतेबा छार रेसे
खेना लाबाकेन लाबा 
अनिश्चित नियात्राला 
बटुवा जेक्खे हिन्ना !
ढाकार नाङ स्हु–स्हेर, ताङ्बा–जेबो 
हापहोप गाप्सि पुइसि ब्राबा
आनि ढाक्रे हिन्ना ! 
तासाइ नोन लाला घमण्ड ब्यर्थला
ओइ म्हि !
याखारगि ताम पाङ्गो ?
तिरे खुद ए ह्राङ्ला आता ।
एला जवानी साम्सि 
शिशिरला ग्लिङ्से ताइना लाबा
खेप्पा दोङ्ला बाह्राङ मार ताइसेला मुला । 
खेप्पा दोङह्राङ लिखन्डि ताला । 
एला जेसुम 
सिसाकलमसे ड्रोईङ्ग ला आङ्सि ह्राङ 
गोल्छे–गोल्छेसे फुंङ्ग 
फ्याङ्सि निला । 
एसे ङाला ह्राङ्लान साक्खे हिन्ना बिबाजुगु 
एला खेप्पादुइ आदाम्ना 
गोल्छेसे थारेङ ताबारि म्हाइला । 
एला ल्हुइला स्यासेम ख्लासि 
एला केवा
नाख्रुदा जिम्मेवार स्होेसि
म्ह्युसिकेन निला । 
स्यान्दोला तिगा ताम लासे
तासाइ नोन दातेइ ओथेबा घमण्ड ?
म्हि 
केवा टुंगो ल्हागतिबा 
तासाइ खाइमा टुङ्गो ल्हागतिला बिसि थाहा आताबा मुद्धा 
फैसला जेक्खे डोङ्बा हिन्ना । 
बक्यौतारि खटप लासि लासि
वकालत लाबा वकिल
आसेबा, आम्राङ्बा थेन आस्याप्बा 
स्याप्माहेन्से फेबारि आङ्यान्बा 
यमलोकला यमराज हिन्ना ।
थाहा मुला ले !
आमाला डोइखाबा गर्भला ग्यालाम ताबान 
दुनियाँरि गोङमा जुबारि याङ्मा
गिक्छा गोइलो ल्हेजाङ थेन भोटोहेन्सि  
दुनियाँग्याम गोङमा थिबा दुइरि याङ्बा
कात्रोरि लोभ युबा 
गोजी, खल्ती, पोकेट आता !
तासाइ नोन लोभला 
ओथेबा घमण्ड !
म्हि 
ए तिगाइ रे हिन्ना । 
तिगाइ रेला डोन्बो जेक्खे हिन्ना । 
डोन्बो ह्राङ्नोन हिन्ना 
खाराङ्लासि एला दिमरि खाबा डोन्बो
खाला निला । 
थेह्राङ्नोन एनोन निसेलान हिन्ना 
निनोन तोला । 
शाश्वत देन्बादा ख्योःबारि आखाम । 
एसे तिगा– तिगा ङाला हिन्ना बिसि
हुकांर लासि 
जाजाबा तिङ्दा स्हुखाना लासि 
ड्याम–ड्याम कुरि थप्पड छेप्सि
चु ङाला हिन्ना !
चु एला हिन्ना !
हल्कारासे चिठी बोठाबा च्योच्यो
बोलाबाकेन मुला
बोठाबारि ताबा स्हे, बोठाबारि आताबा स्हे । 
थे मुतेबा भ्रम हिन्ना । 
पर्दारि म्राङ्बा सिनेमाला 
रापरि ब्योङ्बा पात्र ह्राङ्बान हिन्ना । 
लिच्छारि ए 
थानथान या हिन्ना !
कुईंन्टल गि सिङ हिन्ना !
मुस्लो गि खासु थुर्बारि ब्राबा 
म्युगु जेक्खे हिन्ना । 
मुरि नाङ मेफ्रा हिन्ना !
मेफ्रा स्याल्बारि बाबा 
दार्बुङ नाङ क्युइ हिन्ना । 
एदा डान्बाजुगुला 
जेक्खे डान्बा हिन्ना ।
हार्दिक श्रद्धाञ्जली ताबारि
फ्रेम न्हाङरि कैदी दोबा 
आपाङ्बा, आकोबा, आङेबा 
फोटो जेक्खे हिन्ना ।
थेतासि पाङ्ला, 
म्हि एसे आलासाइ ताला घमण्ड !

पाँचखाल ,काभ्रेपलान्चोक, दाते– लिमासोल, साईप्रस ।

(छिगकि दोनः जेबो–उमंग, आनिम–अस्थायी, साम्सि–ओईलिएर, जेसुम– सुन्दता, आङ्सि– चित्र, ल्हेजाङ– थाङ्गनो, ख्योःबा– छल्न)

दोःबा : यकिना अगाध