बहराइन । नेपाल आदिवासी जनजाति गेन्दुनछेन, बहराइनला आयोजनारि बहराइनरि नोन ३१ छा जाम्बुलिङ आदिवासी जनजाति दिङ्साङ दाङ्जि । गेताङ नेपाली राजदुतावास बहराइला ग्रेन्पो तीर्थराज वाग्लेला डोन्बोग्रेन्पोरि ८ अगस्टकुनु बहराइनला राजधानीरि मुबा अवल होटलला जोम्नाहलरि ताबा मुबा ।

डोन्बोग्रेन्पो वाग्लेसे नेपाल सरकारसे आदिवासी जनजाति समुदायला शैक्षिक, भौतिक, राजनीतिक मुद्दादा सम्बोधन लातोबा ताम थान्जि ।

नेपाल तामाङ घेदुङ, नेपाली क्लब, एनआरएनए, तामु समाज, मगर समाज, नेवा दबु, किराँत याक्थुम चुम्लुङ, किरात राई यायोखातेन ल्होलो गेन्दुनजुगु डिक्सि गेताङ स्हेङ्बा हिन्ना ।

गेताङरि तामाङ, गुरुङ, मंगर, बाइ, राइ, किरातला ग्योइला छ्याम जातीय ङोसेबा म्राङ्बा माउलिक स्याबा सुताइ उन्बा मुबा ।

गेताङला डोन्बोग्रेन्पो, डोन्बोजुगुसे जाम्बुलिङला आदिवासी जनजातिजुगु गिक्खे तासि ह्राङ्ला ङोसेबा, संस्कार, रिमठिम, गोइलो, ग्योइ, धर्मदा ख्युरछ्या थेन ल्हेछ्या लातोबा सेमताम थान्बा मुबा ।

(छिगदोनः छा– औं, गेन्दुनछेन– महासंघ, ख्युरछ्या– संरक्षण, ल्हेछ्या– संवर्धन)